Triang pyneh ka JAC ban weng ïa ka jingïakhih, hiar ka Additional Magistrate sha Umkiang

Ka jingïakhih pakhang surok NH-6 ba la khot pynlong da ka Joint Action Committee (JAC) jong ka Dong Nam-chiang kaba hap hapoh ka Elaka Narpuh ka la poi sha ka sngi kaba lai ha kaba...

Jowai, Jylliew 21

Ka jingïakhih pakhang surok NH-6 ba la khot pynlong da ka Joint Action Committee (JAC) jong ka Dong Nam-chiang kaba hap hapoh ka Elaka Narpuh ka la poi sha ka sngi kaba lai ha kaba ki paidbah ka thaiñ ki la pahara ïa ka surok baroh shisngi shimiet.

Kane ka jingïakhih ka la wanrah ïa ka jing-sangeh ha ka ïaid ka ïeng ki kali bad ktah ruh ïa ki jylla jong ka Thaiñ Shatei Lam Mihngi kum ka Assam, Mizoram, Tripura, Manipur bad ka Jylla kumjuh.

Kane ka jingïakhih ka sdang ha ka step 19 tarik Jylliew ban pynbor ïa ka Sorkar ban maramot ïa ka surokbah NH 6 kaba ym i-kop shuh ban ïoh ïa ka kyrdan National Highway namar ba ka la jot rathai bad kaba dap da ki thliew ki syar bad kaba buh jingma ruh ïa ka iaid ka ïeng u briew bad ki kali.

Katba ha ka 21 tarik Jylliew, ka Additional Magistrate ka East Jaiñtia Hills District, ka Kong J.U. Kharpuri ka la hiar sha shnong Umkiang ban ïakynduh ïa ki nongïalam ka JAC ban kyntu ïa ki ban weng noh ïa ka jingïakhih pakhang surok kaba khlem buh por namar ba ka surokbah NH6 ka dei kaba pynïasoh bad kiwei ki Jylla kum ka Assam, Manipur, Tripura bad Mizoram.

Hynrei na ka liang ka JAC ka la kyntait mardor ïa kane ka jingkyntu da kaba ong katba ka NHAI kam lah ban moramot bad pyndap maw ïa ki thliew ki syar naduh Tongseng haduh Malidor ka jingïakhih pakhang surok kan ïai bteng.

U Chairman ka JAC u Bah Lasting Pala u la ong, kane ka ishu kam dei kaba thymmai, lada shimkhia ka Sorkar ne ka NHAI kan ym jia kumba long mynta haduh ba ka surok kan jot rathai bad dap da ki thliew ki syar.

Ha kawei pat ka liang, ka National Highways Authority of India (NHAI), ka la kam ba ka la sdang ban maramot ïa ka surokbah National Highway-6 da kaba pyndap ïa ki thliew ki syar ban kham suk ki kali ban ïaid ban ïeng bad ïa kane ka jingpyndap maw ïa ki tliew ki syar naduh Tongseng haduh Malidor kan pyndep hapoh 3 sngi.