Shillong, Jylliew 23
Ka Hynñiewtrep National Youth Front (HNYF) Southern Mawsynram Border Area ka la rai ban pynlong da ka jingïakhih halor ka jingkuman bad bym leh eiei jong ka sorkar, ïa ka jingsniew bad jingjot rathai jong ka surok naduh Weiloi ter ter shaduh Umpung.
Kane ka jingïakhih ba la pynbna da ka HNYF Southern Mawsynram Border Area lyngba u President jong ka, u Bah Kyllang Thongni ha ka sngi Saitjaiñ, la ong ba kan dei da ka jingkyrpad ban nym ïaid kali ha ka surok naduh Weiloi, Mawsynram East Khasi Hills ter ter haduh Balat ha South West Khasi Hills ha ka 24 tarik mynta u bnai, ka ban sdang naduh ka por 8 baje janmiet haduh ka 8 baje janmiet jong ka 25 tarik Jylliew 2024.
Haba kren sha ki lad pathai khubor ha ka sngi Saitjaiñ ha Shillong Press Club, u Bah Kyllang u la ong ba ka jingsniew jong ka surok khamtam na Weiloi sha Balat bad sha Umpung kala long kaba jubor bha bad jot rathai kaba la buh jingeh shi katdei eh ïa ka leit ka wan jong ki paidbah.
Une u nongïalam ka HYNF u la kynnoh ruh ba ka jingsniew shaba palat pud jong kane ka surok ka dei ruh na ka jingïoh ïaid laitlan da ki spah tylli ki trok kit Coke bad shyiap ha kane ka surok ryngkat ka jingkit kaba long palat pud.
U Bah Kyllang u la ong, kane ka surok ka dei ruh kaba hap hapoh ki saw tylli ki Constituency kata ka Mawphlang, Mawkyrwat, Mawsynram bad Ranikor bad ki dei ruh ki constituency kiba la mihkhmat da ki MLA na ka UDP, ka seng kaba don ha ka sorkar, kumta kum ka seng ka la kwah ban ïohi ba kin leh eiei noh ha kaba ïadei bad kane ka surok namar kane ka surok kala pynjop bad pynrem MLA ïa kiba bun ngut. Ha kajuh ka por, ka HNYF ka la kyntu ruh ïa u Myntri ba khmih ïa ka tnat PWD (Roads) ka jylla u Bah Prestone Tynsong ban peit lem ïa kane ka surok ne ki hap ban ap haduh ban da ïoh ïa ki MLA na ka NPP.
Ka HNYF haba pynpaw ïa ka jingsngewkhia halor ka jingshah ieh beiñ ka surok naduh Weiloi, Mawsynram haduh Balat sha Umpung, kaba la sniew shaba palat, ka la ong ba kane ka jingïakhih ban pynlong kan long ruh kum shi bynta ka jingpynbor ïa ka sorkar ba kan maramot noh mardor lym kumta ka seng kan sa shim da kiwei pat ki lynti kiba kham tyngeh da kaba lum lang ïa ki paidbah jong ka thaiñ ban tur shaduh Secretariat.
Ka seng ka la maham tyngeh ruh ïa ki trok kiba kit palat pud la ka long mynsngi ne mynmiet hynrei ki dei ban kit bad bud ryntih katkum ka jingbuh ka sorkar. La ong ba kane ka surok ka long kaba donkam haduh katta katta namar ka dei ka surok kaba pynïasoh bad ki kad khaïi sha Bangladesh bad ki hat kiba don ha khappud bad ka Bangladesh, la kam ba na ka daw jong ka jingsniew palat ka surok, ka la don ka jingkiew dor jong ki marbam mardih ruh.
