Shillong, Jylliew 23
Ha ka 22 tarik mynta u bnai, ka kynhun pulit ANTF, EKH, Shillong ha ryngkat ka jingdonlang ki pulit ka thanat Mawlai ka la ïoh kem ïa 2 ngut ki briew na ISBT, Mawïong, kaba hap hapoh thanat Mawlai.
Ïa kitei 2 ngut la tip kyrteng kum u Ram Singh (29 snem ka rta) bad u Vijay Singh (20 snem ka rta).
Ki pulit ki la kurup ruh ïa 9 tylli ki synduk sabon ha ryngkat u ‘heroin’ uba khia 110.32 gm, 2 tylli ki ‘mobile phone’ bad kawei ka ‘Scooty Aprilla’ rong lieh ba khlem nombor na kitei ki 2 ngut.
Haba ïadei bad kane, la pynngat mukotduma ha thanat Mawlai bad ka jingtohkit ka dang ïaid shakhmat.
Ha kawei pat ka liang, ha kane kajuh ka sngi, ka kynhun pulit ANTF, EKH, Shillong ka la ïoh kem sa 2 ngut ki briew na Demthring, kaba hap hapoh thanat Madanrting. Kine ki kynthup ïa ka Kong Evanjelyne Thongni (30 snem ka rta) bad u Bah John Robert Kharmyndai (22 snem ka rta).
Ki pulit ki la kurup ruh ïa kawei ka synduk sabon ha ryngkat u suba ‘heroin’ uba khia 11.43 gm, 2 tylli ki ‘mobile phone’ bad kawei ka ‘Scooty’ ba don ïa u nombor, ML-05-L-7620 na kitei ki 2 ngut. Haba ïadei bad kane, la pynngat mukotduma ha thanat Madanrting bad ka jingtohkit ka dang ïaid.
Kane ka long ka kyrwoh na u Superintendent of Police (City), EKH, Shillong.
