Shillong, Jylliew 23
Ka kompani na Japan ïa kaba la tip kum ka Honda ka la plie paidbah ïa ka jaka die arshaka ïa kaba la tip kum ka ‘Honda Shadap’ kaba don ha Mawblei bad ïa katei ka jaka die arshaka la long trai da u Bah Bhakupar Shadap.
Ïa katei ka jaka die arshaka la plie paidbah da u Yogesh Mathur, Director Sales & Marketing Honda Motorcycle and Scooter India ha ryngkat ka jingïadonlang da ki bahaïing-bahasem jong u Bah Bhakupar, ki nongtrei jong katei ka kompani nalor kiwei-kiwei ki nongshah khot sngewbha.
Ha katei ka sngi la ïoh ban aiti ïa ka thuk-thuk bad kawei ka Scooty sha kiba la thied ïa kine ki arshaka.
Ha kane ka kompani, ki don baroh 4 jait ki Model ha ka Scooty kata ka Honda Activa bad ka Honda Dio kaba 110 CC bad kumjuh ka Honda Activa bad ka Honda Dio kaba 125 CC katba ha ka Motocycle, ki don 9 jait ki Model kiba kynthup naduh kiba 110 CC haduh kiba 200 CC.
Haba kren sha ki lad pathai khubor ha katei ka sngi, u Mathur u la pynpaw ka jingsngewkmen ban ïoh plie ïa kane ka jaka die arshaka kaba nyngkong jong ka kompani Honda ha nongbah Shillong.
U la ong ba ka kompani Honda ka long ka kompani kaba la ïoh jingïaroh na kiba bun ki paidbah kiba la pyndonkam ïa ka mar kaba la pynmih da katei ka kompani.
“Khamtam hapoh ki jylla shatei lam mihngi ka Ri, ngi la pynïar ïa ka kompani bad ngi khmih lynti ba kan wanrah ka jingsngewtynnad ïa ki paidbah kiba pyndonkam ïa ka mar jong ngi. Kane ka dei ka kompani jong ngi kaba nyngkong hapoh ka jylla Meghalaya bad ka dei ka kompani kaba 25 pat ha ki jylla jong ka shatei lam mihngi ka Ri,” la ong u Mathur.
Na ka liang u Bah Bhakupar u la pynpaw ïa ka jingsngewkmen ban ïoh plie ïa kane ka jaka die thuk-thuk kaba u la angnud la slem bah.
U la wer bad kyntu ïa ki paidbah ba kin wan ban thied ïa kine ki arshaka kiba long ki mar kiba bha katkum ka jinglap bad ka jingshem jong u kum u briew u ba don ruh ïa kiwei ki jaka die kali bad thuk-thuk hapoh nongbah.
