Nongstoiñ, Jylliew 23
Ka jingtrei shitom jong u briew lane ki briew bad kino-kino ki kynhun khlem da pynleh nohei ïa ka por wat hapdeng ki jingeh jingjynjar kiba wan ban lyngshop, ka la long pynban kawei na ki jingkyrkhu bad jingmyntoi lehse wat ïa ka imlang ka sahlang bad ruh kum ka nuksa ïa kiba bun balang khamtam ïa kane ka jaidbynriew.
Kane ka khubor ka ïadei ruh bad uwei na ki pulit ophisar uba bat kum u Reserve Inspector (RI) ka 4th MLP Bn, Sohpian ba mynta u Bah Apol Mawñiuh ha kaba hadien ba u la ïoh ban wan trei ha Sohpian ha Battalion, khlem pynleh noh ei ïa ka por ka jong u, khamtam ha ka por jong ka jingwan ka jingkhang dam na ka jingsaphriang sted ka jingpang COVID 19 bad ruh ha ki por kiba lait bad shuti u la ïoh ban pynleit jingmut ban pynmih bad thoh ïa ka kot kaba la ai kyrteng, “Ka Thma u Kada”, bynta ba 4, bad la ong ruh ba u Bah Mawniuh haduh mynta u la dep ban thoh haduh 7 tylli ki kot.
Ïa kane ka kot la ïoh ruh ban pyllait paidbah da ka “Skhem Rympei Tynrai ” ha ka 22 tarik u bnai Jylliew 2024 ha Dorbar Hall ka shnong Nongsohpian, West Khasi Hills ha kaba u Syiem ka Hima Myriaw, u Pa’iem K. Syiem u la long kongsan ha ka jingdonlang Bah Apol Mawniuh kum u nongthoh, u President lane shongknor jong ka Skhem Rympei Tynrai (SRT), u Bah Snenglem A. Kurbah – Sngi , ki nongïalam shnong katei ka thaiñ bad kiwei-kiwei.
U Bah Apol Mawñiuh u la ong ba balei la jied ban pyllait ïa kane ka kot ha shnong Nongsohpian. Ka daw ka long ba namar ba u sah hangne naduh ba u wan trei bad ruh ïa kane ka kot u la sdang ban thoh hangne ha Sohpian.
U la pynpaw ba namar ha ka por ba u sdang wan trei ha Sohpian hadien katto-katne bnai, la sdang ka jingwan ka COVID-19 bad la sdang ruh ka jingkhangdam ha kaba ha kane ka por la bun la shu hap ban shong ïing. Hynrei kane ka la ai lad pynban ïa u ban pule namar um dei u ba shong neh hajuh bad ha ka jaka ban leh ïa kiwei ki kam, u sdang ban wad jingtip bad na kata ka daw u sa kylla thoh ïa kane ka kot.
U la ong ruh ba balei u jied ïa kane ka sngi ban pyllait paidbah ïa kane ka kot. Ka daw ka dei namar ka dei ka Sngi Saitjaiñ bad ka dei ruh ka sngi pynsah kynmaw lane ka sngi burom ïa u kpa ka thoh ka tar, u Thomas Jones.
U la ïathuh ruh ba ha ka jingshisha u khlem thoh ïa kane ka kot hynrei u shu pynkylla khnang ba ki bym nang ïa ka ktien nongwei kin sngewthuh. Ha kane ka kot kaba u la pynmih la batai shai ba um dei ba u thoh ïa kane ka kot bad ïa kiba nang ïa ka ktien phareng lada ki don kano-kano ka jingartatien ïa kane ka kot kin sngewbha ban peit ïa kito ki tyllong lane ki ‘link’ kiba la buh ha kane ka kot ba naei la ïoh.
Haba batai bniah ka mut aïu “Ka Thma u Kada”, u Bah Mawñiuh u la ong ba ka ktien ‘Kada’ ka wan na ka Baibl na ka kitab ‘Genesis’ bad ka ktien ka ‘Thma’ ruh don ha ka Baibl hi ha kajuh ka lynnong, “Ka Thma u Kada” ka dei ka thma ka jingïaleh, ka dei ka jingïakhun ka jingïaleh ban ïoh kurup ban ïoh ban synshar.
