Jowai, Jylliew 23
Kumba ka jingpynkhreh ïa ka Shad Niam Behdienkhlam hapoh ka Raij Jwai ka la ïaid shaid-shaid shakhmat ha kaba ki khun ka Niamtre naduh ki dong ki shnong bad ki longïing ba don bynta ha kum kane ka por ki la ïa bunkam naduh ka jingpynkhreh ïa ki Rot bad kiwei ki rukom lehniam.
Ha ka 23 tarik Jylliew, ki shakri niam ka Raij Jwai naduh u Doloi, u Pator, ki Sangot, ki Wasan, ki kñi jong ki Phra Kur Phra Kmai ryngkat ka jingïadon bynta lang ki Soo Langdoh bad ki Kñi na man ki longïing jong ki khun ka Niamtre ki la ïa leit sha Loom Mookhai ban pyndep ïa ka lehniam Kñia ainguh aidem ba shisien shisnem ïa u Syiem Pyrthat bad ïa u Mon Ryngklaw.
Ha kane ka step shuwa ban mih na ïing Langdoh, u Dolloi, Pator, Langdoh, ki Sangot ryngkat ki shakri niam ka Raij Jwai kin hap ban peit bad bishar ïa ki dak ki shin ba paw ha ki lai tylli ki Kpu Niam ba la shet kyrpang da Ka Langdoh, kiba long na ka bynta ka Raij ka shnong, na ka bynta u Doloi bad na ka bynta U Langdoh bad Ka Langdoh.
Hakhmat ka duwan ïa kane ka jingkñia ainguh la pyndep da u Sangot Paswet ha ryngkat ka jingsynranlang u Sangot Pasubon bad u Sangot Pakynteiñ kiba long ki pateng khun pateng ksiew ka Kur Sookpoh Khat-ar Wyrnai.
U Doloi ka Elaka Jwai Ma Puramon Kynjin u la ïathuh ba kane ka dei kawei na ki jinglehniam ha kaba nalor ki khun ka Raij Jwai la wan ban ïadon bynta lang ruh da kiwei ki Raij kum na Raij Chyrmang, Tuber bad Ïalong bad kane ka jinglehniam ka long kyrpang ban ai nguh ai dem ia u Syiem Pyrthat bad ïa u Mon Ryngklaw.
Ka jinglah ka Raij Jwai ryngkat ki Soo Langdoh bad pyndep ïa kane ka lehniam katkum ba la buh kan long ka jingkyrkhu bakhraw ïa baroh ki khun ka Raij ka Shnong kumjuh ïa ka ri bad ka jaidbynriew ha ka Nongrim jong ka Tipbriew-Tip blei bad Kamai ïa ka Hok.
