Shillong, Naitung 14
Na ka jingïohpdiang ïa ka jingujor na kawei ka longkmie haba ïadei bad ka jingbym ïoh jong ka, ban leh ïa ka MRI ha Civil Hospital, Shillong, na ka liang ka Voice of the People Party (VPP) Youth Wing, ha ka 14 tarik u Naitung, 2026, ka la leit ban kynduh ïa ka Dr. AM Paswet, Joint Director ka Civil Hospital, ban pan jingpynshai halor katei ka kam.
Haba kren sha ki lad pathai khubor, na ka liang u Bah Marbud Dkhar, President, u la ong ba katei ka longkmie hadien ba ka thmu ban leit leh ïa ka MRI ha katei ka hospital, hynrei ki la bthah ïa ka ban wan ha u bnai Nailar bad kane ka la wanrah ïa ka jingsngewkhia namar ba ka donkam kyrkieh ban leh ïa ka jingsumar.
U la ong ba na ka liang ka Joint Director, ka la pynshai ba ka daw, kadei namar ba katei ka hospital ka don tang kawei ka MRI Machine bad namar ka jingbun jong ki briew kiba hap ban leh MRI, ki la hap ban bthah ïa ka ban wan ha kawei ka sngi.
Nalor kata, u la ong ruh ba ka Sorkar ka ju pynbna ba ka pynlut da ki phew klur ha ka koit ka khiah, hynrei haba phai sha ka jingdonkam ha katei ka hospital, ki dang don pynban shibun ki jingduna.
U Bah Marbud Dkhar u la ong ba kane ka nongpang ka la kham shitom bha hynrei haba ka leit sha katei ka hospital, ka khlem ïoh ban leh ïa ka MRI, da kaba ki phah ban leh haduh ka 25 tarik Nailar.
“Haba ka seng ka la leit ban ïakynduh ïa ka Joint Director, la lap ba ka jingslem ban phah leh ïa ka MRI ïa katei ka nongpang, kadei namar ba ka Civil Hospital ka don tang kawei ka mashin MRI,” u la ong.
Shuh shuh u la ong ba hadien kane ka jingleit pynsngew ka VPP, na ka liang ka hospital ka la phah noh ïa kane ka nongpang ban leh ïa ka MRI lashai ka sngi, ym shuh ha ka 25 tarik u Nailar, kumba la bthah.
Namarkata, ka seng ka ai khublei ïa ki doktor kiba la sngap ïa ka jingeh ba ki la pynsngew bad ka la pynpaw ba kane ka hospital ka duna bha ki kor sumar, hynrei ka Sorkar ka lapmiet tang ha ki tamasa, katba ha kaba ïadei bad ka koit ka khiah kam shimkhia.
U Bah Marbud u la kynthoh ruh “Da ki phew klur la pynlut ka pisa ha ka koit ka khiah, hynrei ka MRI mashin pat ka don tang kawei ha Civil hospital”.
Kumta u Bah Marbud u la kyntu ba ka Sorkar kadei ban shimkhia ïa kane ka kam bad ban shimkhia ruh ha ki jaka sumar ba shibun ki jingduna.
