Shillong, Naitung 14
U Myntri Rangbah ka Jylla Conrad K Sangma ha ka sngi Ba-ar u la hiar da lade ban leit jngoh ïa ka jingïaid jong ki kam bad ki jingtei jong ki projek bapher-bapher ha New Shillong Township.
Ha kane ka jinghiar jurip, u Myntri Rangbah u la leit jngoh ïa ka jingïaid ka jingtei jong ka Unity Mall, ka projek ba kongsan kaba thmu ban ai ïa ka rynsan ba kyrpang ïa ki nongshna tiar kti ka Jylla, ki nongthaiñ jaiñ, ki nongsengkam, ki self-help group, bad ki nongpynmih mar ka thaiñ ba kin pyni nam bad pynïaid ïew ïa ki mar ba ki pynmih. Kane ka projek la khmih lynti ba kan kyntiew ïa ka jingseng karkhana ha Jylla, pynkhlaiñ ïa ka kam jngohkai bad thaw ïa ki lad kamai kiba neh.
Nalor kane u la hiar jurip ruh ïa ka jingïaid ki jingtrei jong ka Secretariat Complex ba thymmai, ka Sports Complex ha Umsawli bad kiwei ki kam kiba dang ïaid ha New Shillong Township.
Hadien ba la dep ban jurip, u Myntri Rangbah u la shong bishar ïa ka jingïaid shakhmat jong ki projek bapher-bapher, haba bthah ïa ki agency ba pyntrei ïa ki kam, ba ki dei ban trei bha ïa ki kam, pynthikna ïa ka jingshngaiñ bad pynsted ïa ki jingtrei khnang ban lah pyndep hapoh ka por kaba la buh.
Haba bishar ïa ka jingïaid ki jingtrei jong ka Secretariat Complex, u Conrad u la ong ba kane ka projek kan wanrah lang ïa baroh ki tnad Sorkar hapoh kawei ka tnum, pynkhlaiñ ïa ka jingïatreilang, jingtreikam bha bad ka synshar khadar kaba buh hakhmat ïa ki nongshong shnong hadien ba kala treikam.
Haba shong bishar ïa ka Sports Complex ha Umsawli, u Myntri Rangbah u la ban biang ïa ka jingkut jingmut jong ka Sorkar ban tei ïa ka madan ïalehkai kaba ïaryngkat kyrdan bad ki madan ka pyrthei na ka bynta ki samla jong ka Jylla. Kane ka complex kan ai ïa ki jaka kilan met katkum ka juk bad ki tiar ïalehkai, ka ban ïarap saiñdur ïa ka sap ïalehkai bad ban pynlong ïa ka Meghalaya kum ka jaka pdeng ki kam ïalehkai ha ka thaiñ.
La batai bniah ruh ha u Myntri Rangbah halor ka jingïaid ki kam jong kiwei pat ki projek jingtei ha kylleng ka New Shillong Township. Ha ka jingïalang bishar kam, u la bthah ïa baroh ki agency kiba pyntrei ïa ki projek ba kin pynthikna ïa ka jingïatreilang kaba ïajan, pyrkhing bha ïa ka jingtrei bha ïa ka kam, bad pynsted ïa ka jingtrei haba bud ïa ka por ba la buh bad ki kyndon jingshngaiñ.
U Myntri Rangbah u la pynpaw ba ki projek bala pyntrei ha New Shillong kila buh ïa u mawnongrim ka lawei jong ka Meghalaya. U la pynpaw ba ki jingkynshew ha ki jaka treikam ka juk, ki jaka ïew bad ki madan ïalehkai kin ym tang ban pynbha ïa ka synshar khadar bad jingshakri paidbah hynrei kin plie ruh ïa ka lad kamai, aikam aijam bad kyntiew ïa ka rukom im jong ki paidbah ka Jylla.
Ka Sorkar Meghalaya ka ïai kut jingmut ban pynthikna ïa ka jingpyndep hapoh ka por ïa kine ki projek ki ban wanrah jingkylla khnang ba ki nongshong shnong kin ïoh ïa ka jingmyntoi na ki kham kloi kat kaba lah.
