Shillong, Naitung 14
Ki nongdie soh ha lynter ka surok ha Sawmer bad Hynñiewmer, Upper Shil -long ki la rai ban ïa pyneh beit lada ka Sorkar kan wan rat jubor ïa ki dukan jong ki bad ong ba kin sa ïap thngan namar kim don shuh da kawei pat ka kam ban trei.
Kane ka jingrai jong ki nongdie soh ka dei hadien ba ki bor pynïaid district jong ka East Khasi Hills District ki la ai por ïa kine ki dukan ba kin weng noh hapoh khatsan sngi naduh mynta ka sngi namar lada kim weng kin sa wan pynpra da ka bor.
Haba ïakren bad ki briew kiba shong die soh ki la ïathuh ba ka Sorkar ka la phah mih noh na kane ka jaka die soh ha shi lynter ka surok four-lane hynrei kam shym la ai jaka pat ban shong sha kiwei ki jaka.
“Lada ki mut rat ïa ki dukan ki dei ban rat shwa ïa ngi, namar ngin bam da ei lada ngim ïoh shong die soh hangne harud surok,” la ong kawei ka longkmie.
Shuh shuh ki la ïathuh ba ki dukan die soh ha Sawmer ki don kumba 30 tylli eiei hynrei ha ka sngi Saitjaiñ ba la dep ki la wan pyrta biang ban ai por sa khatsan sngi namar ha u bnai Jylliew ki la dep ai por hynrei kine ki nongdie soh kin nym kynriah lada ym pat ïoh ki jaka da kawei pat.
Ki la ïathuh ba kine kiba shong die soh ha Sawmer ka dei kaba ki la kynriah na Laimer ha u bnai Nohprah 2025 hadien bym don ïew ne lah die namar bym ïaid shuh ki kali naduh ba la dep ka surok Four-Lane.
Ki la pdiang ruh ba lada ka Sorkar ka shah kin kynriah kham shadien namar lada kin phah shong sha kyndong kin nym treh namar kam ïaid ka mar ka mata, hynrei haduh mynta ka Sorkar kam shym la ai ktien eiei.
“Ka don jingktah ïa ngi namar ngi la dep pynlut haba shna ïa kine ki dukan hynrei tang hapoh 7 bnai eiei ngi la shah pynpra katno kan buh jingeh ïa ngi,” ki la ong.
Ki la pynpaw ba ka jingdie soh harud surok ka long ban ïarap ïa kiba leit ba wan namar ki bym ïoh lad ban leit sha ïew hynrei lada ka Sorkar ka ju ong ban pynshlur ban ïeng ha la ki jong ki kjat mynta pat ka khñiot pynban.
