Shillong, Naitung 14
Ka Khasi Students’ Union (KSU) Shillong Mihngi Circle, hapoh ka jingïalam u Assistant Organising Secretary ka Central Executive Cou-ncil (CEC), u Samla Jeremiah Pohthmi, ha ka sngi Ba-ar jong ka taïew, ka la leit ban ïakynduh ïa u DIG ka CBI halor ka jingshna be-aiñ ïa ka Mandir hapoh kane ka ophis Sorkar.
Ha ka kyrwoh ba la phah ka KSU ka la ïathuh, haba ïakren bad une u heh ophisar ka CBI, ka la mih ka jingïania bad ka jingïatai kaba jur hapdeng ki dkhot ka seng bad ki bor pynïaid ophis.
Ha kane ka jingïakren kam shym la poi shaei-shaei, bad na ka liang ki dkhot ka KSU, ki lah pynpaw ïa ka jingsngew bitar da kaba khang tala shi syndon ïa kane ka Mandir, la ong ka KSU.
Haba ai jingkren na ka liang u Assistant Organising Secretary ka KSU CEC, U Samla Jeremiah Pohtmi, Assistant Organising Sceretary u la ong, ba tang ha kine ki snem ba la dep na ka liang ka KSU Shillong Mihngi Circle ka la leit ïakynduh ïa ki heh ophisar ka Ophis CBI ban pynsngew halor ka jingtei be-aiñ ïa ka Mandir hapoh katei ka ophis Sorkar.
Na ka liang ki heh ophisar katei ka ophis ha kito ki por hadien ba ki la ïoh ban ïakren bad ki nongïalam, ki la ai ka jingpynthikna, ba kan nym don shuh ka jingtei ïa ka mandir hapoh katei ka ophis, hynrei tang ha kine ki khyndiat sngi, ka seng ka la ïoh jingtip ba katei ka Mandir ka la sdang ïaid shaid-shaid biang ka jingpyntrei ban tei ïa ka, bad hadien kane ka seng ka la ïoh jingtip ïa kane bad ka leit jurip bad ïohi ba ka jingtei ïa kane Mandir hapoh kane ka ophis ka lah jan dep. Hadien kane ka seng ka la khang tala shi syndon ïa kane ka Mandir.
Ka KSU ka la maham bad ai por shitaïew ïa ki bor ba dei peit ban pynpra ne pynduh noh syndon ïa kane ka Mandir hapoh ka ophis Sorkar.
Ka seng ka maham ruh ba lada kim leh ei-ei hapoh kane ka por ba la buh, kan sa shim da kiwei pat ki sienjam ba kham eh halor kane ka mat.
