Jowai, Naitung 14
U Chief Executive Member (CEM) ka Jaiñtia Hills Autono-mous District Council (JHADC), Bah Thombor Shiwat, u la ujor da ka ejahar ne ka First Information Report (FIR) pyrshah ïa ki nongïalam bad dkhot jong ka Jaiñtia National Council (JNC) bad ka Jaiñtia Students’ Union (JSU), halor ka jingkynnoh ba ki la pynjulor ïa ka khyrdop jong ka Council ha ka por ba ki wan tur sha ophis treikam ka council.
Haba kren sha ki lad pathai khubor, u Bah Thombor u la ong ba ka jingpynjulor ïa ki mar paidbah jong ka Council ka la ktah ïa ka pisa paidbah bad ka la pynmih ruh ka jingsngewkhia hapdeng ki nongtrei ka Council, kiba la kyndit bad sheptieng namar ka jingkulmar.
U la ong ba ka Executive Committee ka sngewkhia jur ïa ka rukom ïakhih, namar ha ka jaka ban wan ïakren ne aiti da ka jingthoh ban pynpaw ïa ki jingdawa jong ki, ki la pyrshang ban rung da ka bor shapoh phyllaw jong ka Council bad pyni paidbah ïa ka jingïakhih da kaba pyrta bad rah plakad.
“Ka jingkwah jong ki ka long tang ban ïoh rung hapoh phyllaw ka Council ban pyni paidbah ïa ka jingïakhih jong ki. Hynrei haba ki la pynjulor ïa ka mar paidbah jong ka JHADC, ngim don lad shuh hynrei ban ujor da ka FIR,” la ong u CEM.
U Bah Thombor u la pynpaw ruh ïa ka jingsngewkhia halor ka bynta jong ki pulit, da kaba ong ba kim shym la lah ban tehlakam ïa ka jingrung jong ki nongïakhih sha ka ophis ka Council bad ki la long tang kum ki nongpeitkai.
Hashwa kane, ka JNC bad ka JSU ryngkat ki paidbah nongshong shnong ka Elaka Nongkhlieh ki la pynlong ïa ka jingïaid paidbah sha JHADC ban dawa ba ka Council kan pyndam mardor ïa ka No Objection Certificate (NOC) kaba la ai sha ka Shree Cement na ka bynta ka projek ba heh 652-hectare ha Lum Syrman.
Ki ar tylli ki seng ki la dawa ruh ban weng noh ïa u Dolloi ka Elaka Nongkhlieh na ka jinglong Dolloi bad ban pynphai ïa ka hok jong ki nongrep ha Lum Syrman.
Ki la kynnoh ruh ba ka JHADC kam shym la lah ban ïada ïa ka jingmyntoi jong ki trai ri trai muluk ka Elaka Nongkhlieh ha kaba ïadei bad ka projek Shree Cement.
