Jowai, Naitung 14
Ki paidbah nongshong shnong ka Elaka Nong-khlieh ryngkat ka jingsynran ka Jaiñtia National Council (JNC) bad Jaiñtia Students’ Union (JSU) ha ka 14 tarik Naitung kila tur bad pynjulor ïa ka khyrdop ban rung shapoh ka phyllaw jong ka Jaiñtia Hills Autonomous Dis-trict Council (JHADC).
Kumba 300 ngut ki nongshong shnong ka Elaka Nongkhlieh, East Jaiñtia Hills District ryngkat ka JSU bad JNC kila ïa mih sha surok bad pynlong ka jingïaid paidbah kaba sdang naduh na madan Dai Masi, Lad-thadlaboh ter ter sha New Hills, Iawmusiang haduh hakhmat ka khyrdop jong ka ophis JHADC.
Ha katei jingïaid paidbah, la rah lang ïa ki banner kaba dawa ban pynduh noh shi syndon ïa ka NOC bala ai sha ka Shree Cement Limited ban seng karkhana pynmih dewbilat ha Lum Syrman ryngkat ka jingpyrta pynrem ïa ka JHADC, ka Shree Cement bad ka jingdawa hiar shuki ïa u Dolloi Elaka Nongkhlieh.
Ynda haba ki paidbah bad sengbhalang kila poi hakhmat khyrdop jong ka ophis JHADC ki la bitar shi katdei namar la khang tala ïa ka khyrdop bad la ker kut ruh da ki pulit.
Ka Magistrate Emelya Ch. Momin ryngkat u Additional SP, Jason Mairom kila ïakren bad ki paidbah kiba kwah ban rung shapoh ka phyllaw ka ophis JHADC.
Hadien ka jingbym plie ïa ka khyrdop, ki paidbah bad ki sengbhalang kila ñiom ïa ka khyrdop nar bad ïoh lad ruh ban rung shapoh ka phyllaw bad kila ñiom ruh ïa ka khyrdop ban rung sha ka kamra treikam u CEM ka JHADC, hynrei la pynsangeh ïa ki da ki pulit bad nongïalam ki ar seng.
Ha phyllaw ka JHADC la pynlong ïa ka jingïalang bad la ïoh ka jingkren na ki trai jaka, na u Reachingson Siangshai bad na ki nongïalam jong ka JNC bad JSU.
