Shillong, Jylliew:
Ka Dorbar Shnong Mawryngkneng hapoh ka jingïalam jong u Sordar shnong, Bah Peter J. Lawai, ha ka 21 tarik u Jylliew ki la leit ban ïakynduh ïa u District Veterinary Officer, East Khasi Hills ban pynsngew halor ki jingduna bad ki jingdonkam ban pynbha ïa ka Veterinary Dispensary kaba don ha Mawryngkneng C&RD Blok.
Ha ka jingïakren bad ki lad pathai khubor, u Bah Lawai u la ong ba ki paidbah nongshong shnong ki ïakynduh jingeh bad duh jingkyrmen shi kat dei eh ban bteng ïa ka kam ri jingri hapoh ka shnong ka thaw kaba long kum ka lad aikam-aijam, namar ki dang don shibun ki jingduna hapoh katei ka Veterinary Dispensary.
U la ong ba ki jingduna hapoh katei ka Veterinary Dispensary ki kynthup naduh ka jingduna ki dawai-dashin, ka jingduna ki briew kiba trei ha katei ka jaka, ka jingbym don ïa ki kamra ai jinghikai sha ki paidbah nalor kiwei-kiwei.
Kumta na liang ka shnong ka la pynsngew sha u District Veterinary Officer halor ka jingdonkam ban don ïa ka ‘training hall’ ne ka kamra ai jinghikai ba lada ka shnong ka donkam ban pynlong ïa ki prokram jingpynsngewthuh paidbah sha ki nongri jingri, ban wanrah ruh ïa ka ‘Boar Semen Collection Centre’ ne ka ban shu injek ïa ki sniang kmie ba kin lah ban armet ne pynïoh sniang khun.
Ka shnong ka la ïoh ban ai jingmut ruh halor ka jingdon ïa ki skhim na ka bynta ki nongri jingri ba ki dei ban peit shwa ïa ki briew kiba la sdang lypa ïa ka kam ri jingri, kito kiba la don ïa ka syrnod ba ki la dep ban pyndep ïa ka jinghikai ri jingri, kiba ri jingri ki dei ban long kiba trei shitom bad kiba don shisha ïa ka mon ban ri jingri bad kaba khadduh eh ka long ba ki dei ban ïoh ïa ka jingpynshisha na u Veterinary Officer hashwa ba kin ïoh ïa ka skhm ri jingri.
U Bah Peter u la ong ruh ba na ka liang u Veterinary Officer u la kular ban shimkhia ïa kane ka kam kaba ka shnong ka la wanrah bad utei u ophisar u la ong ruh ba un sa khmih bniah ba kano ka kam kaba lah ban long bad ka kaba ym lah ban long bad hadien kata pat, un sa pyntip sha ka shnong.
“Na ka liang u District Veterinary Officer u la kular ba un shimkhia ïa kane ka kam bad ban peit la kine ki jingai jingmut jong ngi kiba don phra tylli bad na kine un sa peit kino kiba lah ban long bad kino kiba ym lah ban long, bad hadien kata un sa pyntip sha ngi ïa kane kam”, la ong u Bah Lawai.
