Shillong, Jylliew 23
Ka Meghalaya Energy Corporation Limited (MeECL) ka thmu ban leit mudui sha Supreme Court hadien ba ka Meghalaya High Court ka la pynksan ïa ka kompani Reliance Infratel ha kaba ïadei bad ka bai ilektrik kaba dang sahteng ban siew da kane ka kompani kaba pyndonkam ïa ka ilektrik na ka bynta ki Mobile Tower.
Ka tyllong khubor ka ïathuh ba ka MeECL ka la rai ban nym kynran dien ha kaba ïadei bad ka jingbuddien ban ïoh biang ïa ka bai pyndonkam ilektrik kaba dang sahteng da ki klur tyngka khlem pat siew sha ka MeECL la ka dei da ki kompani bapher bapher ne ki longïing kiba pyndonkam ïa ka ilektrik.
Dang shen ka Ïingbishar Meghalaya High Court ka la pynmih ïa ka hukum kaba pynksan ïa ka kompani Reliance ha kaba la ong ba ki bor ba dei khmih jong ka Jylla kam lah ban pynbor hapoh ka kyndon aiñ Insolvency and Bankruptcy Code, 2016 ban siew ïa ka bai ilektrik kaba naduh mynshwa lada kata ka bor ba dei khmih ka Jylla kam shym la pyni ba ka don kano-kano kaba batai ba ka jingsiew kaba sahteng ka dei kaba la dep rai lypa bad mynjur ïa kata ka rai.
Kum ban pynkynmaw, ka MeECL lyngba u Chairman-cum-Managing Director jong ka u Sanjay Goyal ka la buddien ban phah siew ïa ka pisa kaba dei ka bai ilektrik kaba ki kompani bapher bapher kiba buh ïa ki Mobile Tower ha kane ka Jylla ki pynsahteng kham mynshwa.
Hynrei ka Reliance Infratel ka la leit mudui pynban sha Ïingbishar Meghalaya High Court ha u snem ba la dep bad ka Ïingbishar ka la pynmih ïa ka rai ka bym pynksan ïa ka Meghalaya Power Distribution Corporation Limited (MePDCL) kaba dei ka kompani hapoh jong ka MeECL kaba ju sam bording ha kane ka Jylla.
Kumta ka MeECL ka la sngewdei ban leit mudui sha Supreme Court ban kyrpad ïa ka Ïingbishar ban tuklar bad ai ka rai kaba shongnia ïa ka jingleh ka MeECL ban ïohlum ïa ka pisa kaba dei hok ban ïoh na ka kompani da ki klur.
