Shillong, Jylliew 23
Uwei u khynnah ba dang 15 snem ka rta uba dei na ka jaidbynriew Nepali bad u shong u sah ha Nongmensong, u la shah rah ha ka umsaw ha ka Sngi U Blei katba ki dang thmu ban leit jngi kham shaneng jong ka jingkieng Urkaliar.
Haba ïakren bad u kpa jong une u khynnah u Krishna Shetri, u la ïathuh ba une u khun, u la shah rah ha ka um ha ka por kumba 3:00 duna janmiet katba ki dang thmu ban leit jngi para khynnah kumba 3 ne 4 ngut.
U la ïathuh ba na ka jinghap kynsan u slap, ka wan ka umsaw kaba heh bad ka la rah ïa utei u khynnah bad ïa kita ki paralok ba leit lang la ïoh ban pyllait na ka jingshah rah ha ka um. Na ka liang u kpa jong une khynnah u la pyntip ïa ki pulit ka Nongmensong halor kane bad haduh mynta kim pat lap hynrei ki dang ïai pynlong ka jingwad.
Ban lap ïa une u khynnah ki pulit ki la leit ap na jingkieng Polo shaduh Mawlai hynrei haduh ban thoh ïa ka khubor ym pat ïoh jingtip.
