Tura, Jylliew 24
Ka AMMSU na Ri-lum Garo ka la kyrpad ïa ka Expert Committee halor ka bhah thung kam ka Jylla ban pyrkhat ha ka ban mang kumba 15% ïa ka bhah thung kam na bynta ka thup ‘General Category’ bad ym sha kito kiba la ïoh jingmyntoi lypa na ka thup ST.
Ka seng haba pdiang ïa ka jingdonkam na bynta ka bhah kaba la don lypa na bynta ki trai-ri ka Jylla kum ki Khasi, Jaiñtia bad Garo, ka sngew ba donkam ban shimkhia ruh ïa ki jingtynjuh ha ka liang ka imlang-sahlang bad ka ïoh ka kot kaba ïakynduh da kiwei pat ki jaidbynriew (general community) hapoh ka Jylla. Ka seng ka la phah ruh ïa ka jingai jingmut halor kane ka bynta sha u Secretary ka komiti, Bah L.K. Diengdoh.
“Kane ka jingtyrwa wanrah jingkylla kan kyntiew ïa ka roi ka kiew ha ka imlang-sahlang bad ka ïoh ka kot kaba kynthup lang, bad kaba biang tara hapoh ka Jylla, da kaba pyntikna baroh ki jaidbynriew ki ïoh bynta ka bym shah liang ha ka jingmihkhmat bad ki kabu. Da kaba shimkhia ïa kane ka mat, ka Sorkar Jylla kan pyni ïa ka jingtrei hok jong ka ha ka jingïabiang lang bad ka jinglong hok na bynta baroh ki nongshong shnong jong ka,” la ong ka seng ha ka shithi.
