Williamnagar, Jylliew:
Ka Meghalaya State Legal Services Authority (MSLSA) ha ryngkat ka jingïasnohktilang bad ka tnad ka koit ka khia, Social Welfare, pule-puthi bad kiwei-kiwei ha ka Sngi Saitjaiñ ka la pynlong ïa ka ‘Mega Camp-cum-Awareness’ prokram ba shi sngi halor ki skhim ka National Legal Services Authority (NALSA) bad ki skhim ka bha ka miat ka Sorkar halor ka phang, “Back to School” ha Madan Rongrenggre Govt. Higher Secondary School.
U Kongsan ha kane ka sngi, u nongbishar ka ïingbishar ka Jylla bad Executive Chairman ka MSLSA, Justice H.S. Thangkiew, haba ai jingkren u la ong ba ka jingpynlong ïa kiba kum kine ki prokram ka long ban pynïajan ïa ki paidbah bad ki tnad ba pyntreikam ïa ki skhim bapher-bapher.
Haba kdew ba ka pule-puthi ka pynbiang ïa kiba bun ki kabu sha ki khynnah, u Justice Thangkiew u la ban jur halor ka jingdonkam ban ai mynsiem ïa ki khynnah bad kyntu ïa man la kawei-pa-kawei ka longïing ban pynlut ha la ki khun ki kti.
U Justice Thangkiew u la ïathuh ba kiba bun ki khynnah ki la hap ban kiar na ki skul ha ka por jong ka khlam COVID-19 katba kiwei pat ki la hap ban mih noh na ki skul namar ka jingeh ha ki ïing ki sem.
U la ong ruh ba ka jingdon jong ki briew kiba la nang la stad hapoh ka Jylla ka long 75%.
Ha kajuh ka por, u la kdew ïa ki kyndon ba ïadei bad ki lad jingkyrshan ha ka liang ka aiñ jong ka MSLSA ha ka ban pynduna ïa ka jingkyrduh bad ki lad jingshakri bym donkam siew eiei ba ïadei bad ka aiñ na bynta kito kiba duna ka ïoh ka kot jong ka imlang-sahlang. U la ïathuh ruh ba ka MSLSA ka la sdang ïa ka prokram ban pynsaphariang jingtip halor ka pule-puthi na bynta ki khynnah.
Na ka liang ka Joint Secretary ka tnad Social Welfare, ka Sabrella B. Marak, ka la kren halor ki skhim bad prokram kiba la pyntreikam da ka tnad bad ki jingmyntoi ba la sam sha ki nongïoh jingmyntoi hapoh ka ‘Mission Shakti’ bad ‘Mission Vatsalya’.
Ka Deputy Director ka School Education & Literacy, ka R.Z. Das, ka la kren halor ki sienjam kaba la shim da ka tnad pule-puthi ban ai mynsiem ïa ki ‘Out-of-School’ bad ‘Drop-out-Children’.
Ha kane ka sngi, Dr. CEN Sangma, DM&HO, East Garo Hills, la kren halor ki skhim ‘Financial’ bad ‘Non-Financial’ jong ka tnad ka koit ka khiah hapoh ka National Health Mission (NHM).
District and Sessions Judge, Williamnagar, B.M. Joshi, la ai ïa ka jingkren pdiang katba ADC, D.A. Sangma, la ai ïa ka jingkrean ai khublei.
Hadien kane, u Justice Thangkiew u la plie ïa ka “Back to School Campaign” lem bad 11 tylli ki NIOS Centre ha kylleng ka Jylla.
Ha kajuh ka por, u la sam ruh ïa ki syrnot na bynta ki ‘School-drop-out-Children’, ki tiar ïarap na bynta ki briew ba don jingduna ha ki dkhot met, ‘cheque’ bad ‘Work Order’ sha ki nongïoh jingmyntoi jong ki skhim Sorkar bapher-bapher.
