Ïoh bording tang 1-2 kynta ka Umtrai ha ka shisngi, hap thang sharak ki khynnah ban khreh kot

Halor katei ka bynta, u Bah Marngar u la pynsngew ba u Myntri u la kular ban buddien bad wad ïa ka daw haba ïadei bad kane ka kam.

Shillong, Jylliew 24

U MLA ka Congress na Mawhati konstitwensi, Bah Charles Marngar ha ka Lah Sngi U Blei u la ïakynduh ïa u Myntri ka tnad Bording, u Abu Taher Mondal ban pynsngew ha u halor kiba bun ki jingeh kiba ki paid nongshong shnong ka thaiñ ki ïakynduh ha ka liang ka bording.

“Ka jingwan jong nga banyngkong eh ka dei halor ka jingbym biang ka bording…kane ka la ktah shibun ïa ki nongshong shnong. Ki shnong kiba hajan Umsning, syndah Umroi, surok Mawrong la kumno-kumno ki dang kham biang ha ka liang ka bording. Ki shnong pat kum ha Mawhati Area, Sonidan Area, Umtrai Area bad ka Umsiang Area ki mad shisha ka jingeh,” la ong u Bah Marngar.

U la ïathuh ruh ba haba phai sha Umtrai Area, ka jingïoh bording ha ka shisngi ka long tang kumba 1-2 kynta bad kane ka long ka jingeh kaba khraw khamtam ïa ki khynnah skul kiba pynkhreh ïa ki eksamin jong ki.

“Kumno kin khreh kot, mynta kin pynkhreh ïa ka eksamin jong ki hapdeng ka jingdum, hap pyndonkam kum ha ka por hyndai da ki sharak,” la ong u MLA haba kren sha ki lad pathai khubor hadien ka jingïakynduh ïa u Myntri ka tnad bording.

Haba kdew ba bun bah ki nongshong shnong ka thaiñ ki dei kiba thaiñ jaiñ, u la ong ba ka jingbym biang ka bording ka la ktah shi kat dei ïa ki naba ki pyndonkam da ka isteri kaba ïaid da ka bording.

“Sa kawei ka jingeh ba ïakynduh haba ïadei bad ki nongtrei dieng – nalor ka jingkyrduh kam, ki samla kiba pyrshang ban leh da ki ‘Skill Development Programme’, ka bording kam don, shaei ka lawei jong ki khun samla ka dong ka thaiñ,” u la ong.

Halor katei ka bynta, u Bah Marngar u la pynsngew ba u Myntri u la kular ban buddien bad wad ïa ka daw haba ïadei bad kane ka kam.

Ha kawei ka liang, haba kdew ba ka daw jong kane baroh ka dei na ka jingduna nongtrei, u MLA u la ïathuh ba ha Umsiang haduh mynta, ym pat thung bujli ïa ka kam ‘Lineman’ uba la khlad naduh ka snem 2010.

Haba phai sha ka bynta jong ka jingpynïasoh bording, u la ong ba ka shnong Makadoh, Maska, Amjong, Markhangduba, Amdubighat, Amphreit, Nongthymmai-Makadoh, haduh mynta kim pat ïoh bording.

“Ha u snem 2018-19, ka don ka skhim na ka DDUGJY-I, ha kaba ki la sdang ban pyndait ïa ki sainar, buh ïa ki ‘Transformer’, hynrei kaba sngewsih ka long ba haduh mynta, kita ki la shu jot ei, sakma bad pra bad haba ïadei bad kane, na ka liang jong nga, nga la kyrpad jur ïa u Myntri ba la kumno-kumno hapoh ka juk shai mynta, hapoh konstitwensi, ym dei shuh ban dang don ki longïing longsem ki bym don bording,” u la ong.

Na ka liang utei u nongmihkhmat u la ban biang ba u Myntri u la kular ban shimkhia noh kloi katba lah ïa katei ka kam.