Shillong, Jylliew 24
Kum shibynta na ka jingrakhe ïa ka ‘International Day Against Drugs Abuse And Illicit Trafficking’ ne ka jingrakhe baroh shityllup ka pyrthei halor ka jingpyrshah ïa ka jingdih bad ka jingkhaïi ïa u drok, ka Seng Kynthei Lumbasuk ‘A’ Unit bad ka Dorbar Shnong Lawjynriew ha ka Lah Sngi U Blei ka la pynlong ïa ka prokram pynsngewthuh paidbah halor ka jingsniew u drok halor ka phangpdeng “The evidence is clear: Invest in prevention” ne ka “Ka sakhi ka la shynna: Nohsynñiang ha jingïada”.
Ïa katei ka prokram la pynlong hapoh ka Com-munity Hall jong ka shnong Lawjynriew. Ha katei ka sngi ka shongknor ba la pynïaid ïa katei ka prokram ka dei ka Dr. V. Kharmawphlang ha kaba la ïoh ïa ka jingkren lyngkot na u Rangbah Shnong ka Lawjynriew, u Bah B.S. Kharshandi, u Rev. V.T.S Langstieh, u Tbn. K. Hynñiewta bad ka la don ruh ka jingphylliew jingmut ha kaba la pynïaid da ka Dr. V. Myrboh bad ka jingaikhublei na ka Kong M. Nongrum kaba dei ka Secretary ka Seng Kynthei Lumbasuk-A.
Haba ai jingkren ha katei ka sngi, na ka liang u Rangbah Shnong ka Lawjynriew, u Bah B. S Kharshandi, u la ong ha ki khyndiat sngi ba la dep, ka la don ka jingïalang kaba la long hapdeng ki Dorbar Shnong bad ka sorkar halor u drok ha kaba na ka liang ki katto-katne ki Rangbah Shnong ki la ong ba ka sorkar kam don jingeh eiei ruh em ban pynduh jait ïa u drok napoh ka jylla lehse tang hapoh ki khyndiat taïew lane khyndiat bnai hynrei kam lah ban pynduh bad ïa ka daw ban pynduh jait ïa u drok, ym lah satia ban ong ne pyrkhat kaba lehse ka don kaei-kaei sha lyndet jong kane.
“Ngim kynnoh ïano-ïano hynrei ngi dei ban ban jur ïa ka sorkar ruh khamtam ïa ka tnad pulit khamtam katne ki don ki tnad pulit bad ki nongsyntiat ha kaba ïadei bad kumno ba ki lah wanrah ïa u drok hapoh ka jylla jong ngi, ki tip bha hynrei ka don kaei-kaei sha lyndet kaba lehse ka dei ka jingmyntoi jong ki ne lehse ka dei kaei-kaei kaba ngim lah ban pyrkhat ne sngewthuh”, la ong u Bah Kharshandi.
U la ong ba ha ka pateng ka ban sa wan ym don jingtip shuh ïa ka lawei jong ki khynnah bad kane kan ktah ïa ka ïap-ka im jong ka Jaitbynriew lada kum ka jylla kam kyndit bynriew ha kum kane ka por namar kane kan wanrah jingeh kaba khraw kum ka Jaitbynriew.
U Bah Kharshandi u la ong ba haba ïohkem ïa ki khynnah nongdih drok ha kitei ki thaiñ jong ka shnong, na ka liang ki pulit ki ju ong ba ym bit satia ban shoh ban dat ïa ki khynnah dih drok ne ban pynshitom ïa ki hynrei tang kumba shisngi arsngi pat, kitei ki khynnah dih drok ki la leh biang ïa kajuh ka kam.
Shuh shuh u Bah Kharshandi u la ong ba kum ki Dorbar Shnong haba ki ju ïoh bat ïa ki nongdih ne nongkhaïi drok, ka jingeh ka dei ïa ka Dorbar Shnong namar ki ju shah thlia bad shah wan mih shapoh ka ïingbishar la kum ba ki dei pynban ma ki kita ki nongdie ne nongkhaïi drok katba kiba dei shisha ki nongkhaïi bad ki nongdie drok pat ki ju ïoh shongsuk bad leh baheh.
U la ong ba kum ka shnong baroh kawei ka donkam ïa ka jingïatreilang markylliang ban wanrah ïa ka shongsuk shongshngaiñ hapoh ka shnong ka thaw bad kumno ban ai ka jinghikai bad ka jingpynsngewthuh ïa ki khynnah.
