Shillong, Nailar 04
Ka Federation of Khasi State (FKS) ha ka Sngi Ba-ar ka la leit ban ïakynduh ïa u Lat ka Jylla u C. H. Vijayashankar ban pynpaw ka jingsngewkhia ïa ka jinglong jingman hapoh ka Khasi Hills Autonomous District Council (KHADC) bad kaba kynnoh ba ka Council ka sdang ban pynkulmar ïa ka rukom synshar khadar bad bthat ïa ka synshar tynrai.
Ha ka jingkren sha ki nongthoh khubor u Pa’iem Laborious Manik S Syiem nongaibuit ka FKS u la ong ba ka Federation ka dei kaba peit ïa ka bha ka miat jong baroh 25 tylli ki Hima kiba don hapoh ka Bri u Hynñiewtrep bad u la kam ba dei kane ka Federation kaba la ïa don bynta ban ïasoi iwei hadien iwei u Syiem ïa ka Instrument of Accession (IoA) kaba dei ka jingïasoi ban pynïasnoh sha ka Ri India.
U Pa’iem Laborious u la ong ba ka jingthung Syiem bad pynkheiñ Syiem kumjuh ka jingpynkheiñ Sordar ka long pyrshah ïa ka nongrim bad ka dustur, u la kynnoh ba ka dei ka jingleh palat pud jong ka KHADC da kaba maham ba kam dei shuh ban dang bteng.
U la ong ba ka jingïoh ïa ka Sixth Schedule ka long ba kan sumar pynneh pynsah ïa ki rukom synshar khadar kiba la don naduh mynshuwa, kynthup ruh ban pynneh pynsah ïa ki riti dustur bad ki jinglong kyrpang kiba itynnad tam jong ka Jaidbynriew, hynrei u la kynnoh ba kumba ka long mynta ka KHADC ka pynjot bad ka pyntroiñ pynban ïa ka rukom synshar tynrai kiba la longhok longtrai jong ka jaidbynriew Khasi-Khara, dei namar kane ba ka Federation kam lah shah ban shu sngap kaba la pynlong ban ïakynduh ïa u Lat ka Jylla ban phah tuklar ïa ka jingleh palat jong ka District Council.
