Shillong, Nailar 04
Ka Tnad Khlaw jong ka Meghalaya kala ïoh ban kem noh ïa saw ngut ki briew bad kurup ïa ki bniat hati lem bad ki suba snieh kyrbei ha ki artylli ki jingkhynra ba la pynlong ha Ri-Bhoi District.
Ïa kane ka jingkhynra la pynïaid shakhmat da ka Nongpoh Wildlife Range, Khasi Hills Wildlife Division, hadien ka jingïoh ïa ka jingtip kaba thikna.
Ïa ka jingkhynra kaba nyngkong la pynlong ha ka 18 tarik Naitung ha lynter ka surok Umwang, hadien ka jingïoh khubor na ka Wildlife Crime Control Bureau ïa ka jingdon ka kam khaïi tuh hapoh ka surok Nong-poh-Umden.
Ki nongtrei ka Wild-life kila ïoh bat noh ïa arngut ki briew bad kila ïoh kurup ïa 4 tylli ki bniat hati ïa kaba la ngeit ba dei jong ki Hati Asiatic.
Kine ki arngut ki kyrteng u Tras Khymdeit bad u Wilshon Khymdeit ba na Ri-Bhoi. Ïa kine ki arngut la register case hapoh ka Wild Life (Protection) Act, 1972 bad ka jingtohkit mynta kala ïaid shakhmat.
Katba ïa ka jingkhynra kaba ar pat la pynlong ha ka 2 tarik Nailar hapoh ka shnong Shakhoikuna.
Ka kynhun kala bat ïa lai ngut ki suba bad kurup ïa artylli ki pla kiba don ïa ki snieh ba suba dei jong ki Kyrbei.
Arngut na ki, la tip kyrteng kum u Benedict Khymdeit na Ri-Bhoi bad u Rupai Ingti ba na Kamrup, Assam la kem noh da ka kynhun katba uwei pat u la lait phet. Ïa kine ki mar la kurup noh hapoh ka Wildlife Act bad la register case pyrshah ïa ki.
Ki ophisar ka Wildlife ki pyntip ba ki hati bad ki kyrbei ki dei kiba don ha ka thup jong ki mrad kiba la ai jingïada bha hapoh India bad ka jingkhaïi ïa ki dkhot met jong ki, ka buh ha ka jingma ïa ka jingduh jait jong ki.
Ka tnad ka la ban jur ïa ka jingïaleh ka jong ka, ban tehlakam ïa ki jingkhaïi tuh ïa ki mrad khlaw bad kyntu ïa ki nongshong shnong ban ai ïa ki jingtip lada don kano-kano ka jingleh beaiñ, khaïi bad shalan ïa ki mrad khlaw sha ki ophis ba jan jong ka tnad Khlaw.
