Shillong, Nailar 04
Ki nongdie jingdie madan na ka thaiñ Laitumkhrah ha ka sngi Ba-ar jong ka taïew, ki la pynpaw ba kim treh ban kynriah na Laitumkhrah tad haduh ba ka Shillong Municipal Board (SMB), kan ai syrnod Consent of Vending (CoV) sha baroh kiba ju die jingdie ha katei ka thaiñ.
Ïa kane ki nongdie madan ki la pynpaw hadien ba ki la wan pan jingpynshai na ka SMB halor ka jingslem ban ai CoV sha ki para ba ïashong die jingdie hapoh ka thaiñ Laitumkhrah.
Haba kren sha ki lad pathai khubor, ki nongdie madan ki la kam ba ki don kiba la ïoh ïa ka CoV hynrei kim treh ban kynriah na Laitumkhrah tad haduh ba kiwei ki para ba ïashong die jingdie ki ïoh lang ïa ki CoV.
“Kito ruh ki thngan, kin leit shongdie jingdie shano, da ngi wan hangne ruh ki ong, kan don ka Hearing, lano kata ka Hearing,” ki la buh jingkylli.
Shuh shuh ki la ong, ba ar sien la pyndep ïa ka Hearing hynrei haduh mynta ki dang don bun ngut ki bym pat ïoh ïa ka CoV. “Lada kiwei kim ïoh CoV, ngi ruh ngim treh ban leit sha kano-kano ka jaka ba phah ka Sorkar” ki la bynrap.
Ki la ïathuh ba ki la ïoh ïa ka slip ban leit sha ka Hearing, hynrei haduh mynta, ym pat ïoh satia ïa ka CoV. “Imat ki shu jied ban ai CoV ban ïoh shongdie jingdie madan” ki la kynnoh.
Ki nongdie madan ki la pynpaw ruh ïa ka jingpyrshah ïa ka jingthmu jong ka Sorkar Jylla ban pynkynriah noh ïa ki na Laitumkhrah ha ka 17 tarik mynta u bnai, da kaba dawa ba ka Sorkar kadei ban ai ka jaka kaba marjan bad ka Laitumkhrah, khnang ban lah ban ïadie.
Ki la pynpaw ba ka jaka ba ka Sorkar ka ai ïa ki ha Brightwell, kam long kaba biang bad ki dawa ruh na ka Sorkar ba kadei ban ai jaka ïa ki marjan hi bad ka Laitumkhrah.
“Lada ka Sorkar ka wan ban kyndang jubor, ngin nym shah bad ngin pyrshah beit,” ki la ong.
