Nongpoh, Nailar 04
Ka Hills Farmer Union (HFU) kala pynpaw ïa ka jingsngewkhia jur halor ka jingbym ïoh ban ïakynduh ïa u Officer-in-Charge ka thanad Byrnihat na ka bynta ban ïoh jingpynshai halor ka jingkynnoh lum khajna beaiñ ha katei ka jaka ïa ki kali kit mrad kiba wan rung shapoh ka Jylla.
U Bah Alfondbirth Kharsyntiew, Secretary ka HFU Sengkmie u la ïathuh ba u OC ka Byrnihat u la khot ïakren ha ka janmiet ka sngi Nyngkong, hynrei namar ka jingkhim ka por, u la ong ban pynbeit noh ïa ka jingkynduh ha ka 4 tarik u Nailar ha ka por 11:30 mynstep ha Byrnihat, ha kaba ka seng kala thmu ban ai da ka jingthoh na ka bynta ban pan jingshai.
U Bah Alfondbirth u la ïathuh ba ynda ki la poi ha thanad Byrnihat, kim shym la ïohlad satia ban kynduh ïa u OC ka Byrnihat namar la ïoh jingtip ba u la leit ban pyndep ïa ki kam ki jam kiba ïadei bad ka ïingbishar.
“Ngin ai por shiphew sngi ïa u OC ban ai jubab ïa kine ki jingpan jingpynshai jong ka HFU bad lada um lah pynshai ryngkat da ka jingthoh katkum katei ka por, na ka liang ka HFU, ngim banse ban mih shakhmat bad ngi buh ïa kane ka kyntien ba wat pynbor ïa ngi ba ngin kyrpad ïa ka Sorkar ba dei ban sospon ïa une u OC lada um lah ban pynshai,” la ong u Bah Alfondbirth.
Hadien ka jingbym ïoh kynduh ïa u OC, ka seng kala leit pat ban kynduh noh ïa u Dr. Abhishek Saini, Deputy Commissioner ka Ri Bhoi ban pynpaw ha u ïa ki jingeh kaba ki paidbah nongri jingri ki ïakynduh.
Haba kren sha ki lad pathai khubor hadien ka jingïoh kynduh bad u DC ka Ri Bhoi, u Bah Alfondbirth u la pyntip ba ka seng kala kyrpad ba un bthah ïa u OC ka Byrnihat ba un ai ka jingpynshai katkum ka jingkwah jong ka seng kaba la dep ban ai ruh da ka jingthoh.
Kum ban shu kdew hangne, ka jingpynshai kaba ka seng ka la pan ka dei halor ban tip kaei kata ka ‘Direct Entry? Shaei kane ka pisa kaba lum ka leit? Kaei ka bynta kaba ki pulit ki don bad kane ka jinglum khajna? bad kaba khatduh ka dei halor kino ki kyndon ba la lum ïa kane ka khajna?.
U Bah Alfondbirth u la ïathuh ruh ba ka seng kala kyrpad ïa u DC ka Ri Bhoi ba un buh da ka kynhun tohkit kaba bniah lane kata ka Special Investigation Team (SIT) ban lap ïa ki jingshisha halor kane ka jinglum khajna bad kyrpad ruh ba un pynmih da ka hukum ne ka order ba dei ban sangeh mardor ïa kane ka jinglum khajna beaiñ ïa ki kali kit mrad kaba la ktah shikatdei ïa ki nongri jingri ka Jylla.
Utei u nongïalam u la pyntip ruh ba u DC ka Ri Bhoi u la kular ban shimkhia halor kitei ki mat bad ba un bthah ïa u OC ka Byrnihat ban ai jingshai sha ka seng. Ha kaba ïadei bad ka hukum ban phah sangeh ïa ka jinglum khajna beaiñ bad ban buh ïa ka SIT, u Bah Alfondbirth u la ïathuh ba u DC u la pyntip sha ki ba un ap shwa ïa ka kaiphod bad hadien kata un sa leh ïa kaba donkam.
Halor kane ka bynta, ka seng kala pynpaw ïa ka jingai khublei ïa u DC ka Ri Bhoi uba la kloi ban pdiang bad sngap ïa ki jingeh jong ki nongri jingri ka Jylla, kiba la wanrah da ka seng. U la ong ruh ba ka seng kan ïai bteng ban buddien halor kane ka kam ryngkat ka jingtreilang bad ki tnad treikam Sorkar khnang ban pynïoh ïa ka hok jong ki nongrep bad ki nongri jingri.
