Shillong, Jylliew 24
Ka jingther u ‘lapbah ha kine ki bnai ha ka jylla ka la pynlong ïa ki nongdie bad ki paidbah nongthied jhur ha ïew ha hat ba kin ud-nam shikatdei eh na ka jingshah lynshop ki jhur bad ki jhep jong ki nongrep kaba sa pynlong pat ban kiew ka dor ka mur ha ïew ha hat.
Haba ïakren bad katto-katne ki nongdie jhur ha ïew ki la ïathuh ba mynta la kumba shitaïew ne artaïew eiei, la jan baroh ki jhur ki la kiew dor kiba kynthup kum u sohsaw uba la poi haduh T. 70 shi kilo ha kaba ka dor barim ka dei T. 40 ne T.50 shi kilo bad ym tang u sohsaw uba la kiew dor hynrei wat u tyrso bad kumjuh ki jhur kiba wan nabar ruh ki la kiew dor lut.
Ki la ong ruh ba lada duna jhur ha ïew, ka dor ka kham kiew bad lada ther u slap kum ha kine ki bnai, ka dor ka kiew namar bun ki jhur ki la julor lut kaba pynlong ïa ki mar ba kin duna hynrei teng-teng ki la hap ban die katkum ka dor pat khnang ban pyrkhat lem ïa ki paidbah nongthied ruh kumjuh.
Haba phai sha ki marbam-mardih kum u khaw, ka umphniang, u piat bad u phan ki nongdie ki la ïathuh ba kine ki marbam ki la kiew dor tang khyndiat kata tang da T. 20 ne T. 30 eiei na ka dor kaba dei mynshwa.
