Shillong, Jylliew 24
Ka jaka ïeng kali kaba don hajan jong ka Additional Secretariat ha kaba ju pynlong ïa ki jingïakhih bapher bapher, mynta na ka liang jong ka Sorkar ka la khang bad ker noh syndon da ki nar.
La ïohi ba ka la don ka jingpynïeng da ki nar naduh ba sdang haduh ba kut. Lada peit la i thik kumba ka jingthmu ka long beit ban khang noh shi syndon ïa kino- kino ki jingïakhih ban pynlong ha kane ka jaka.
Kane ka jaka ïeng kali kaba don hajan Additional Secretariat, ka dei ka jaka ha kaba la sakhi ïa bun ki jingïakhih ba la pynlong da ki seng bapher bapher, ki seng saiñ pyrthei, kum ka jingshong kyllaiñ myngor, ka jingshong shah thngan bad kiwei kiwei ki jingïakhih.
Ka jingïakhih ba khatduh kaba la ïoh ban pynlong ha kane ka jaka ka dei da ka Kong Bindas Syiem. Ka Kong Syiem ka la shong shah thngan na ka bynta ban dawa na ka sorkar ban pynbha bad maramot noh ïa ka surok Nongpoh-Umden-Sonapur.
Hadien jong katei ka jingïakhih shong shah thngan, ka sorkar ka la phah ker noh ïa katei ka jaka bad ka jingtrei ka dang ïaid shakhmat mynta ha kaba la ïohi ba la pynïeng ïa ki nar bad la dep ban tih ïa ki thliew ban pynïeng ha katei ka jaka.
Na ka liang ki briew kiba sakhi ïa ka jingker ha kane ka jaka ki la pynpaw ba imat ka sorkar ka kwah ban khang noh shi syndon ïa kane ka jaka ban nym ailad shuh ïano-ïano ruh ban ïoh pynlong jingïakhih nangne shakhmat ha katei ka jaka.
