Shillong, Jylliew 24
Ka Federation of Khasi Jaiñtia & Garo People (FKJGP), Balat Border Unit ka la pynpaw ka jingsngewkhia halor ka jingleh meinah ka Sorkar Jylla haba ïadei bad ka jingsniew jong ka surok kaba na Mawphlang haduh Balat.
“Ngi pynpaw ka jingsngewdiaw halor ka jingud-jingnam jong ki nongshong shnong kiba la pynsngew sha ka seng na ka por sha ka por ïa ka jingsniew jong ka surok,” la ong u President ka FKJGP – Balat Border Unit, Bah Sengborlang Syiemlieh.
U la ïathuh ba ka seng ha ki snem kiba la dep, ka la ïakynduh ruh ïa u Secretary ka tnad PWD halor katei ka surok.
Haba kynthoh ïa ka Sorkar halor ka jingïakynduh jingeh ka dong ka thaiñ khamtam ha kine ki sngi ba mynta, u Bah Syiemlieh u la ong ba ka Sorkar ka leh mynthi bad leh meinah halor ka jinglong-jingman jong kane ka surok.
“Haba phai sha ka jingsniew jong ka surok, ka la slem bha, hynrei kaba la kham palat eh ka dei naduh ba sdang ther u slap ha kine ki khyndiat sngi ba la leit,” u la ong.
U la ïathuh ruh ba ka jingjur u slap ha kine ki sngi ba la dep ka la ïalam sha ka jingtwa khyndew, ha kawei ka liang kaba la nang pynsniew shuh-shuh ïa ka surok.
“Ngi ïohi ba ka long kaei-kaei kaba ma bad ka jingmynsaw ïa ka dong ka thaiñ kaba mad ïa kane ka jingeh,” u la ong.
Ha kajuh ka por, u la kdew ba ka jingkit palat pud jong ki trok kit dewïong, shini, shyiap bad kiwei-kiwei ki mar kiba ïaid da ki bun tylli lyngba kane ka surok bad miet bad sngi ka long sa kawei na ki daw kaba ïalam sha ka jingsniew jong ka surok.
“Ka jingdon jong ka Border Haat ha Dangar, Ranikor, ka la pynlong ïa ki kali ba kin ïaid da ki spah bad hajar tylli ha ka shi sngi. Ka long ruh ka jinglehraiñ kaba khraw ban ong ba kat ka surok khappud, ka jingsniew ka long shaba palat,” la ong u President.
U la ong ruh ba ka jingsniew ka surok ka la buh jingeh shi kat dei ïa ki nongshong shnong ka dong ka thaiñ khamtam ïa kiba pang ba shitom.
U Bah Syiemlieh u la pynpaw ruh ka jingdiaw namar ka jingbym phai khmat ka Sorkar sha ka dong ka thaiñ.
Halor ka jingkieng Umpung, utei u nongïalam u la ong wat la ka don ka jingthoh kaba la kdew shai ba ym shah ban kit palat pud ïa ka 9 ton, hynrei la sakhi ba ki don ki kali kiba pynkheiñ ïa katei ka jingthoh jong ka PWD.
“Ka jingkieng ha Umpung ka la slem bha, da ki 50-60 snem mynshuwa, ym shym la maramot, ngi la donkam ban shna noh da kawei namar ka jingkieng ïa mynta ka la sator bad don hapdeng ka jingma,” u la ong.
Shuh shuh u la bynrap ba ka seng ka kren shai ba lada jia eiei ïa ka jingkieng ha Umpung, kata ka Sorkar kan hap shim ka jingkitkhlieh bad kyntu ruh ba kan phaikhmat bad pynbha noh kloi ïa kane ka surok kaba don hapdeng ka jingma khamtam namar ka jingjur jong u slap ha kine ki sngi.
