Shillong, Jylliew 24
Ki pulit jong ka Anti-Narcotic Task Force (ANTF), East Jaiñtia Hills District ha ka Lah Sngi U Blei ki la ïoh ban kem noh ïa saw ngut ki snar nongkhaïi drok bad kurup ruh ïa u drok ba khia 164.99 gram.
Kane ka jingïoh kem jong ki pulit ka ANTF hapoh ka jinglam khmat da u Deputy Superintendent of Police (Crime) u Bidhan Bhattacharjee ïa kitei ki snar nongkhaïi drok ha ka jingtalasi kali ba la pynlong ha Khliehriat, East Jaiñtia Hills ka dei hadien ba ki la ïoh ïa ka jingtip kaba bniah ba arngut ki briew lem bad kawei ka kynthei ki la wan da kawei ka kali na ka thaiñ Silchar ryngkat ka jingwanrah lang bad u drok.
Napdeng ki saw ngut, lai ngut kiba la shah kem ha Umtyra ki dei na Assam kiba kynthup ïa u Sahin Hussain Laskar na Nagdirgram, Cachar, u Rofiqul Alom Laskar na Harsinghpur Nagdirgram, Cachar bad ka Mamta Sinha na Simgiri, Chibitabicha, Cachar bad kawei pat ka kynthei kaba la shah kem ka dei ka Maya Gwala ba la sin kyrteng kum ka Puchki kaba sah ha Pynthorbah, Shillong.
Ïa ka Maya Gwala ki pulit ki la ïoh kem na Khliehriat katba ka dang ap ban shimti ïa u drok ba la wanrah da kitei lai ngut. Ki pulit ki ïathuh ba ka Maya Gwala ka dei ka snar nongkhaïi drok kaba la shah kem teng ha u snem 2023 ha ki pulit ka Khliehriat bad pynngat mukotduma ïa ka hapoh ki kyndon 21(b)/29 NDPS Act 1985.
Shuh shuh na ka liang ki pulit ki la ïathuh ba kitei ki lai ngut ki la wan da kawei ka kali Hyundai Venue kaba don ïa u nombor AS01-EJ-8977 na Silchar. Mar ïatip halor kane, ki pulit ki la pynlong ka jingpynap ktem bad ïoh bat ïa kane ka kali ha Umtyra bad ha ka jingkhynra ki la lap ïa u drok ba la thep ha ki khatsan tylli ki synduk sabon bad hadien ba la peit bniah la pynshisha ba u dei u drok heroin.
Ha ka jingtohkit, ki lai ngut kiba la shah kem na Umtyra ki la phla ba ïa u drok ki la thmu ban aiti ha kawei ka briew kaba kyrteng ka Maya Gwala ba ju sin kyrteng kum ka Puchki kaba dang ap ha Khliehriat.
Halor kane, ki pulit ki la pynrung mukotduma pyrshah ïa kine saw ngut ha thanat Khliehriat bad ka jingtohkit ka dang ïaid shakhmat. Na ka liang ki pulit ki la kurup noh ïa u drok, kali bad ki mobile phone na kine ki saw ngut.
