Shillong, Naitung 17
Ka Jylla Meghalaya ka la ïoh pdiang ïa ka jingkiew kaba heh tam, kaba long 95% katba ka tnad Skill Development & Entre-preneurship ka Sorkar Pdeng (MSDE) ka la pynïar ïa ka Special Intervention for Prom-otion of Apprenticeship (SIPA) sha ka Thaiñ Shatei Lam Mihngi hapoh ka PM-NAPS na ka bynta u snem mang tyngka 2026-27.
Kane ka prokram, ka ban pyntreikam da ka IIE-Guwahati ha ryngkat ka jingmang pisa kaba T.57.58 klur, ka thmu ban pynïar ha ka liang ka jingai jinghikai pyntbit ban kyrshan ïalade ha baroh 8 tylli ki Jylla ka Thaiñ Shatei Lam Mihngi bad ban pynkhlaiñ ruh ïa ka ïoh kam ïoh jam ki samla hapoh ka ‘Skill India’.
Ïa ka thong na ka bynta une u snem la pynkiew da kumba 15%, kata sha ka 30,000 ngut ki ban ïoh jinghikai.
Na kine, ïa kumba 15,000 ngut yn phah shabar jong ka thaiñ ha ki tnad treikam ka Sorkar Pdeng bad ki PSU, katba ïa 15,000 ngut kiwei pat kin ïadon bynta hapoh ka Thaiñ Shatei Lam Mihngi kynthup ha ki Jylla jong ki.
Ha kajuh ka por, la pynheh shuh ïa ka jingai jingïarap kaba T.1,500 shibnai lyngba ka jingkyrshan ka PM-NAPS. Hashuwa, la pynleit jingmut ba kito kiba la ïoh jinghikai ki hap ban mih noh shabar, hynrei mynta pat, yn kynthup ruh ïa kito kiba ïadon bynta lang hapoh ki Jylla ba ki shong ki sah.
Kane ka sienjam kan dang bteng ban kyrshan ïa ki ‘Workshop’, ki jingpynsngewthuh paidbah, ka jingïadon bynta lang ki nongaikam, bad ki jingïatreilang bad ki shlem pule bad karkhana ban pynkhlaiñ ïa ka jinglong-jingman ba ïadei bad ka ‘Apprenticeship’.
Ha ka jingpyrshang ba la sdang ha u bnai Jymmang, 2025, 23,470 ngut ki samla kiba la ïoh jinghikai pyntbit ki la ïoh ban ïadon bynta na ka jingbuh thong kaba 26,000 ngut, kaba la lah ban pynurlong palat 90%. Ka jingdon jong ki dkhot ‘Apprentice’ ha ka Thaiñ Shatei Lam Mihngi ka la kiew da 51%, kata na ka 15,562 ngut ha u snem mang tyngka 2024-25 sha ka 23,470 ngut ha u snem mang tyngka 2025-26.
Na kine, 13,673 ngut, ki la ïoh ïa ki lad ki kabu shabar jong ka Jylla jong ki bad 9,797 ngut ki la ïadon bynta hapoh ka thaiñ. Ka jingïashim bynta jong ki kynthei bad ka jingïadon bynta jong ki nongaikam ruh ka la sakhi ïa ka jingkiew kaba jur, ha kaba ka jingïashim bynta jong ki tnad Sorkar ka la kiew arshah.
U Myntri Khynnah, u Jayant Chaudhary u la ong ba ka jingpynjlan kan pynïar ïa ka jinglah ban ïoh bynta ïa ki ‘Apprenticeship’ kiba paka bad ïarap ruh ïa ki samla ka Thaiñ Shatei Lam Mihngi ban ïoh ïa ka jingshemphang ha ki jaka trei la ka long hapoh ka thaiñ bad ha kylleng ka ri kumjuh.
“Ka Thaiñ Shatei Lam Mihngi ka dei kawei na ki bynta ba khlaiñ tam jong ka India, ha ryngkat ki samla don sap bad ki jingangnud kiba kloi ban synñiang sha ka khana jong ka roi ka par jong ka ri. Ka jingjop jong ka jingpyrshang banyngkong ka pyni ba da ki lad ki kabu bad ka jingkyrshan kaba biang, ki samla jong ngi ki lah ban sei madan ïa ka jinglah ba pura jong ki. Da kaba kner ïa kane ka sienjam hapoh ka PM-NAPS, ngi pynïar ïa ka jingïoh bynta sha ki lad ki kabu ‘Apprenticeship’ kiba paka, ban pynkhlaiñ ïa ki jingdon-jingem hapoh ka thaiñ, ban pynshlur ïa ka jingïashim bynta jong ki karkhana, bad ban ai lad ïa ki samla na ka thaiñ ban ïoh ïa ka jingshemphang kaba kordor ha ki jaka trei hapoh ka Thaiñ Shatei Lam Mihngi bad ha kylleng ka Ri kumjuh,” u la ong.
