Shillong, Naitung 17
Ka Khasi Students’ Union (KSU) Shillong Mihngi Circle ha ka jingsynran lang ka Organising Committee ka KSU CEC, ka la khang tala noh ïa kawei ka Masjid ha 4-Furlong.
Ïa kane ka kynhun jong ki dkhot ka KSU la ïalam khmat da u Samla Cleenstar Shabong, Organising Secretary.
Ka Seng ka la khang tala noh ïa kane ka Masjid kaba la tei be-aiñ ha 4-Furlong.
Na ka liang jong ka seng hadien ba ka la ïoh jingtip ba ka don kawei ka Masjid ba tei be-aiñ ha ka jaka ba la kam ba la longtrai da u wei u bar jylla, uba kyrteng u Nurul Choudhary, ïa kane ka Masjid la tei be-aiñ khlem ki kot ki sla bad ki jingpan bor na ki bor ba dei peit.
Ka Seng ka la buh jingkylli haba ïadei bad ki kot ki sla bad kumno bad nangno ki ïoh jingbit ban tei ïa kane ka Masjid.
Ka KSU ka la lap ba kane ka Masjid ki kot ki sla ruh kidei ha ka kyrteng jong u bar jylla, kaba ka seng kam tip naei u ïoh ban thied ïa kane ka jaka.
Ka KSU ka la kdew ba kane ka pynlyngngoh bha, namar ba kumno ki shna ïa kane ka Masjid khlem da ïoh jingbit nano-nano ban shu tei katba mon ïa ki mandir ne ki masjid ha ka Jylla.
Kumta ka KSU ka la khang noh mardor ïa kane ka masjid tad haduh ban da ïoh peit ïa ki kot ki sla, ba kadei ha ka kyrteng jongno bad mano ba la die ïa kane ka jaka sha ki bar jylla.
