Shillong, Naitung 17
Ka Khasi Students’ Union ka phah ïa ka khubor kaba shai sha ka Sorkar ba kan ym ailad da lei-lei ban khlong ïa u mar poh khyndew (Uranium) hapoh ka Jylla bad maham ruh ïa kito kiba don jingthmu ban leh ïa kane ka kam.
Ïa kane la kren da u Samla Raymond Kharjana President ba mynta ka KSU haba ai jingkren ha ka jingïalang kynmaw burom ïa ka lyngkhuh sngi ïap ba 191 jong u Tirot Sing Syiem, ha kane ka sngi la pynlong ruh ïa ka jingbuh syntiew ha u Mot
sahnam u Tirot Sing ha Madan Ïewrynghep, Laitumkhrah Shillong ha kaba la wan ban ïashimbynta lang ka Federation of Khasi Jaiñtia and Garo People (FKJGP), ka North East Students’ Organisation (NESO) bad kiwei.
U Samla Raymond u la ong ba ka KSU ka pynpaw ka jingsngewnguh ïa ka rai jong ka Sorkar Jylla ban mynjur da ka ‘Resolution’ ka ban pyrshah ïa ka jingtih Uranium hapoh ka Jylla bad u la ban jur ïa ka Sorkar ba ka jingmynjur ïa ka ‘Resolution’ kam dei ka lynti kaba la kut halor kane ka mat.
U la ong, ka seng haba ka la sdang ban khyllie biang ïa kane ka mat, ka la shem ba kiba bun ki riew pawkhmat jong ka Jylla ki la sdang ban hiar sha ka thaiñ Domiasiat, South West Khasi Hills ban pyntieng pynsmiej ïa ki paradoh parasnam.
“Hooid ngi sngewthuh bad ngi ïohi ba ka Sorkar kan mynjur ïa kata ka ‘Resolution’, hynrei kaba kongsan ka long ba ka Sorkar ka dei ban pynlong ïa ka jingtih bniah ba balei kita ki riewshimet ki sdang ban shim ïa ki jaka ha kitei ki thaiñ” la ong u Samla Raymond.
Shuh-shuh u Samla Raymond u la ong ba ka KSU kam salia ban pha ïa la ka jong ka jingim bad kam kynran dien wat ban shim ïa ka jingim jong ki mynder ri kiba thmu ban pynkylla langïong ïa ki paradoh parasnam jong ka jaidbynriew.
Haba bynrap, u la kdew ba dang shen ka KSU ka la ïoh ban ïakynduh ïa u Myntri Rangbah ka Jylla ha kaba ka la ban jur, ba kat haduh mynta kam shym la don kano-kano ka aiñ ka ban tehlakam ïa ka jingwan rung ki mynder ri sha kane ka Jylla, “Ka la dei ka por ba ka Sorkar kan pyni ïa ka jingshimkhia bad ka jingkitkhlieh, namar ka jaidbynriew Khasi ka dei kaba rit paid bad ka don hapdeng ka jinglong syier ba ïoh ha kawei ka sngi kan shah tyllup bad jah klep noh na kane ka snieh pyrthei” u la ong.
U la kdew ruh haba ïadei ka ‘Resolution’ ILP ba la dep ban mynjur da ka Sorkar, ha kaba haduh mynta mynne ka dang sah ha ka umdum, “Nangne shakhmat ngin long kiba adkar, namar ngi la ïohi ba la ‘Pass’ ïa ka ‘Resolution’ na kawei ka por sha kawei pat, hynrei ym shym la ïohi ïa u soh jingjop na ka jingmynjur ka Sorkar” u la ong.
