Mawkyrwat, Naitung 17
Ka kynhun ki hati khlaw ha ka miet jong ka 14 tarik u Naitung, 2026 ki la hiar thma ïa ka shnong Kolomboit kaba don hajan ka shnong Photkroh, South West Khasi Hills District ha kaba ki la pynjot-pynpra bad pynjulor ïa ki mar-rep mar bad ïa kawei ka ïing sah briew.
Katkum ka jingïathuh u Bah Ralding Khar Ryja, u trai jong katei ïing ba la shah pynjulor ha ki hati khlaw, u la ong kine kitei ki hati ki don kumba 13 tylli eiei bad u la ïathuh ruh ba ki la pynjulor da ki spah tylli ki dieng kwai, ki la pynjot ruh ïa ki sohtrun bad ïa u sying.
U la ïathuh ruh ba donbok ba ha katei ka miet ym shym la don briew ha ïing bad u la ïathuh ba ha katei ka ïing la sah ma u, ka lok bad lai ngut ki khun.
U la ïathuh ba ka jingwan pynjot kine ki hati khlaw kam dei shuh ka sien banyngkong ha kane ka thaiñ bad mynta ruh ki dang don hajan kham pajih na shnong briew.
Ka jingwan pyndik kitei ki hati ka la buh jingsyier ruh ïa ki paidbah haduh ba kim nud shuh ban leit sha ki jaka rep namar kitei ki hati ki beh ruh ïa ki briew, la ïathuh u Bah Ralding.
Ha kaba ïadei bad kane ka jingjia, na ka liang u Bah Ralding Khar Ryja u la kyrpad ïa ka Sorkar ban thaw ki lad ki lynti ban ïarap lem ïa ki jingshah pynjulor bad ban thawlad ban ai jingïada lem ïa ki nongrep namar kine ki hati ki im ki sah beit ha kine ki jaka mynta la kumba 3 ne 4 snem.
