Shillong, Naitung 17
Ka Kur Syiemlieh Shillong Unit ha ka 17 tarik u Naitung 2026, ka la kynmaw burom ïa ka lyngkhuh sngi ïap ba 191 snem jong u Tirot Sing Syiem, da kaba leit buh syntiew ha u Motdur ba shirynïeng jong u, uba don ha Soso Tham, Shillong.
Ha kane ka sngi la ïadonlang u Bah Wanbor Syiemlieh, President Kur Syiemlieh Unit Shillong, General Secretary Bah Susil Syiemlieh, Bah Embhah Syiemlieh Executive Member Kur Syiemlieh Shillong Unit, ki longkmie bad haduh ki hep kiba rit jong ka kur.
Haba kren ha kane ka sngi, ki nongïalam ka Kur Syiemlieh Shillong Unit ki la ong ba ha ka jingïaid lynti jong ka kur, ngi ïohi ba u Tirot Sing u dei u wei u nongprat lynti jong ka ri bad ka jaidbynriew, u riew radbah, u riewshisha bad u dei ruh u briew ba dohïap bad satar wat ban rieh ha ki krem ban ïaleh pyrshah ïa ki phareng.
“Kum ka kur, ngi don ka jingdiaw shibun eh, namar ba ha kum kane ka por, ki briew ki duna bha ban dohïap bad ki duna ban long kiba satar kum u Tirot Sing,” ki la ong.
Ki la ïathuh ruh, ba ka jingshah kem u Tirot Sing, kadei ha ka 13 tarik u Kyllalyngkot (January) 1833 bad hadien ar snem ka jingshah kem jong u, u Tirot Sing u la khlad noh ha ka 17 tarik u Naitung (July) 1835, bad kaba sngew sarong kum ka kur, ka ri bad ïa ka pyrthei baroh kawei ka long, ba u Tirot Sing u la ong ki kyntien “Danglah ban ïap kum u Syiem Laitluid hapoh byndi, ban ba synshar kum u Syiem mraw ha la ka jong ka ri”.
“U Tirot Sing u long ka nuksa na bynta ka ri bad ka jaidbynriew bad ka long ruh ka nuksa na ka bynta ki pateng jong ngi, ba ka synshar ka khadar kadei ban long ha ngi ki Khasi,” ki la ong.
Ki nongïalam ki la pynkynmaw ruh ba ïa u Tirot Sing la kha ha ka snem 1802, bad ha ka jinglong Syiem jong u, u la ïakynduh ïa ka jingïaleh bad ki nongwei, kata ki phareng. Hadien ba wan ka thma ngi ïohi ba u Tirot Sing u la shah kem noh bad hadien kata u la khlad noh.
Kumta ki la kyntu ba kine ki pateng ba mynta kin ïai buddien ïa ki kam ba une u Syiem u shakri ïa ka ri bad ka jaidbynriew bad kam dei eh ka jingburom tang ïa u Tirot Sing hynrei kadei na ka bynta ka ri bad ka jaidbynriew.
