Shillong, Jylliew 24
U Myntri ka tnat Housing ka Jylla, u Marcuise N Marak u la ïathuh ba u la phah tohkit ban wad la ka don ne em ka jinglehthok ha kaba ïadei bad ka jingthied ïa ki tin sop ïing khamtam ka jingrben jong ki tin kiba dei ban sam sha ki nongïoh myntoi.
U Marak u la ong ba wat lada ka kaiphod kam pyni satia ba don kano-kano ka jingbym biang, hynrei haba la don ka jingujor, la bthah ban don ka jingtohkit hapoh ka tnat.
U la ong ba ynda la dep ka jingtohkit bad lada lap ba ki don ki jingbym biang yn sa leh ei ei bad ai dak sniew ïa ka kompani kaba pynpoi ïa ki tin. U la bynrap ba lada don kiba donkti lang na ka liang ki ophisar jong ka tnat, yn pynngat lang ïa ki ruh.
Dang shen, ka Hynñiewtrep Youths’ Council (HYC) ka la dawa ban don ka jingtohkit ha kaba ïadei bad ka jingthied bad pynpoi ïa ki tin sop ïing ha kaba la kynnoh ba ki tin sop ïing ki dei ki bym bha kaba long mar khongpong bad ka jingbthah ka tnat Housing.
U Myntri u la ong ba ka tnat ka la dep ban wad jingtip bad ym shym la lap ba ka don ka jingleh bakla bad u la pynshai ba ka tnat ka la phah pynpoi da ka Aluminium Corrugated Sheets (ACS) ym da ka Corrugated Galvanised Iron (CGI).
U la ong ba ka CGI ka kham khia ban ïa ka ACS namar ka ACS ka kham sting bad kham neh slem ym kum ka CGI kaba kloi ban kem sarang.
U la ïathuh ba ka tnat Housing ka la rai ban pynpoi da ka ACS bad la jied ïa ka kompani da kaba shu khot ‘tender’ ha u snem 2022.
Ka kompani kaba ïoh ‘tender’ ka dei ka Hariana Iron Works Pvt. Ltd, Kolkata na West Bengal.
