Jowai, Jylliew:
Ka North Liberty Higher Secondary School (NLHSS), Jowai ha ka 21 tarik Jylliew ka la pynkup burom ïa baroh ki khynnah skul kiba la ‘pass’ bha ha ka eksamin SSLC bad HSSLC (Arts bad Science) jong une u snem 2024.
Ïa ka jingïalang pynkup burom la pynlong ha phyllaw ka skul ha ka jingdonlang u Director Administration, MBoSE, Shillong, Bah Mackdonald Marbaniang kum u kongsan, ka Sub-Inspector of School, Jowai, ka Kong C. Lyngdoh kum ka Symbud kongsan, u Principal ka skul, Bah Richard B Uriah, ki kmie ki kpa, ki nonghikai, ki khynnah skul bad kiwei-kiwei.
Kane ka dei ka sien kaba 13 ba ka NLHSS ka la phah ïa ki khynnah jong ka ban ïakhun ïa ka eksamin MBoSE bad ka dei ka sien kaba 7 na ka bynta ka HSSLC ‘Arts’ bad ka sien kaba 5 na ka bynta ka ‘Science’.
Mynta u snem la don 3 ngut ki khynnah ka North Liberty H.S. School kiba la rung ha ka thup ‘First Ten Position’ HSSLC ha ka ‘Science’ bad ‘Arts’.
Ha ka ‘Science’ ki long u Weibha Nongtdu Lakiang uba la wan ha ka kyrdan kaba 6 da kaba khur 93.2% bad u Joshavian Onan Paswet uba la wan ha ka kyrdan kaba 7 da kaba khur 92%. Katba ha ka ‘Arts’ ki long u Fredrique Qweneth Ryngkhlem u la wan ha ka kyrdan kaba 7 da kaba khur 85.2%.
Kiwei pat kiba la shah pynkup burom ki kynthup ïa ki khynnah SSLC kiba don 133 ngut bad HSSLC kiba don 94 ngut kynthup ha ka ‘Science’ 35 ngut bad ha ka ‘Arts’, 59 ngut.
U Director Administration, MBoSE, Shillong, Bah Mackdonald Marbaniang, u la ong ka imlang ka sahlang ka donbok bad ka long ka jingkyrkhu ba don kane ka skul, kaba hajan tam ban sam ïa ka jingnang-jingstad ban ïoh ïa ka jingpule kaba katkum ka juk kaba mynta.
Haba kyntu ïa ki khynnah, u la ong kum ki khynnah skul kin hap ban klet ïa ki jingsngewbha pyrthei, ka imlang ka sahlang, ki kam khwai dawai bad kine ki saw snem ki dei kiba kongsan ban duriap ha ka pule ka puthi ban jop ha ka jingim.
“Phi ki khynnah skul phi dei ban don ïa ka mynsiem ïaishah ha ka jingim, namar ka ‘syllabus’ ka long kaba ïar kumta kum ki khynnah skul phi dei ban don ïa ka mynsiem ïaishah,” la ong u Bah Marbaniang.
U la pynshlur ïa ki khynnah ban ïakhun ïa ki ‘Competitive Exam’, khamtam ki Civil Service ki païa ban pynbha ïa ka synshar-khaddar namar ba ki Khasi bad Jaiñtia ki dang duna bha kiba ‘pass’ bad ha kajuh ka por u la ai khublei bad kitbok kitrwiang ïa ki khynnah pule kiba rung ha ka ‘Top 10’ bad ‘Top 20’ ha ka ‘Arts’ bad ‘Science’.
U la ong ba na ki phew hajar ki nongïakhun ïa ka eksamin kam dei kaba suk ban ïoh rung ha ki kyrdan ba shakhmat.
Shuh shuh u la ïaroh ïa ka West Jaiñtia Hills District, da kaba ong ba ka dei ka distrik kaba la kiew bha ha ka liang ka pule puthi hapoh ka Jylla ha kaba man u snem ka jing ‘pass’ jong ki khynnah ka long 80% shaneng la ka long haka eksamin SSLC ne HSSLC bad kane ka pyni shisha ba ka distrik ka la kiew bha ym tang ha ka liang ka pule-puthi hynrei wat ha ka liang ka kam ïalehkai ‘Sports’ – kane ka distrik ka la sei shibun ki rang bad thei ïalehkai kiba tbit.
