Shillong, Jylliew 24
Ka jingkhynra bar jylla da ka Anti-Infiltration jong ka tnat Pulit ka long kaba donkam na ka por sha ka por bad ka KSU ka kyntu ïa kane ka tnat ba kan ïai bteng ha baroh ki dong ki thaiñ jong ka jylla.
Ka jingkhynra bar jylla ka dei ban ïaid ruh ryngkat bad ka jingïatreilang bad ki Dorbar Shnong bapher bapher khnang ba yn lah ban teh lakam kham bha ïa ka jingwan rung kyrthep ki bar jylla namar kane ka mat ka dei kaba ktah shikatdei eh ïa ka jinglong trai ki Khasi ha la ka khyndew ka shyiap bad ruh wat ïa ka jingneh jingsah u paid Khasi ha la ka Bri U Hynñiewtrep.
Ka KSU ka ai jingïaroh ïa ka tnat Anti-Infiltration kaba la khynra ïa ki bar jylla ha ka Lah Sngi U Blei hapoh shnong Nongmensong bad Mawpat katkum ba la paw ha ki lad pathai khubor. Tangba ka KSU ka pynpaw ïa ka jingbym sngewhun namar ki pulit kane ka tnat ki pan tang ïa ki EPIC, Aadhaar bad Labour License hynrei ki klet pat ïa ka Work Permit kaba dei kawei ka kot kaba kongsan tam ban ïoh buddien ïa ki bar jylla ba wan trei sha Meghalaya.
Kane ka kot katkum ka Inter-State Migrant Workmen Act (Amendment) 2011 ym tang ba ka pyni ïa ka jaka sah lane shnong trai ki bar jylla hynrei ka pyni ruh ïa ka jinglong kine ki briew kiba wan nabar la ki dei ‘riew bymman ne kiba la ju don dak bad ka aiñ. Shuh shuh kane ka aiñ ka khanglad ïa kine ki bar jylla ba wan trei wan ktah ban ïoh long trai shnong ha ka jylla namar kin hap pynthymmai ïa la ka Work Permit man la ka 179 sngi.
Ka jingkhynra bar jylla khlem da dawa ïa ka Work Permit ka long kaba dkoh haduh katta katta namar kane ka aiñ ka pyrkhing ïa ka jingthmu shong shnong ki bar jylla. Kumta ka seng ka kyntu ïa kane ka tnat pulit ba nangne shakhmat ka dei ban pan ïa ka Work Permit na baroh ki bar jylla bad ki kontraktor jong ki bad lada kim don dei ban pynphai biang ïa ki na ka jaka ba ki wan lane pynshitom katkum ki kyndon aiñ. Shuh shuh, ka Work Permit ka dei ka aiñ ba pura ka jylla kumta dei ban pyntreikam bniah bha ïa ka ha ki jingkhynra bar jylla.
Ha kawei pat ka mat kaba ïa bnoh lang bad ka jingrung kyrthep ki mynder, ka KSU ka buh jingkylli biang ïa ka sorkar shaei ka Meghalaya Residents Safety & Security Act (MRSSA) 2016 ka jah rngai? Kaei kaba pynsah teng ïa ka sorkar ban pyntreikam ïa ka haba ka sorkar pdeng lyngba ka Ministry of Home Affairs (MHA) ka la pynphai biang ïa kane ka aiñ sha ka sorkar jylla.
Ka KSU kan sa wad jingtip halor kane ka mat na ki bor sorkar ban kan sa shim ïa ki rai ban pynbor treikam ïa kane ka aiñ. Kyntang ïa wai ka KSU ka pynkynmaw biang ïa ka sorkar MDA ïoh lehse ka klet, ba kan leit tynruh kham tyngeh sha ka sorkar NDA halor ki mat ba kongsan kum ka ILP, ka ktien Khasi ban rung ha Khyrnit ba Phra bad kiwei kiwei. Kane ka long katkum ka kyrwoh khubor ba la pyllait da u General Secretary ka KSU u samla Donald V Thabah.
