Nongstoiñ, Jylliew 24
Katkum ka tyllong khubor ba la ïoh lum la ong ba uwei briew u la duh noh ïa la ka jingim hadien ba la suba jur ba u la ryngkoh na kawei ka riat kaba don ha ka thaiñ Umyiap ha West Khasi Hills.
Ka khubor na ki pulit ka district ka la ong ba ïa utei u rangbah la tip kyrteng kum u Bah Hotstar Lyngkhoi, 43 snem ka rta na ka shnong Synñia ha West Khasi Hills.
Nalor nangta ka khubor na ki pulit ka ong ruh ïa katei ka jingjia la pyntip da uwei u rangbah ha ka 24 tarik u Jylliew 2024 ha ka por kumba 12.55 shiteng synñia.
Ki la ong ruh ba mar ïa ïoh jingtip, ki pulit na ka thanat Nongstoiñ mar-mar ki la leit sha katei ka jaka ha kaba ki la lap ïa utei u rangbah (Hotstar Lyngkhoi) uba la thiah lyngktar hajan ka pyntha kba ha ka thaiñ Umyiap ha ryngkat ka jinglyngkieñ ka snam bad ka jingmynsaw kaba jur bha.
Halor kane ka jingjia, na ka liang jong ki pulit ki la pynkit noh wut-wut ïa utei u rangbah sha Civil Hospital Nongstoiñ na ka bynta ban pynïoh ïa ka jingsumar kaba kyrkieh. Pynban la ong ba ynda la poi ha hospital, u Medical Officer uba don ha katei ka por u la pynbna ba la u la dep ban khlad lypa. Shuh shuh ki pulit ka district ki la ong ruh ba hadien katei la rah noh ïa ka met ïap jong utei u rangbah sha ka jaka buh metïap jong ka hospital na ka bynta ban pyndep ïa ka post mortem bad ka jingtohkit halor ka jingïap jong utei u rangbah ka dang ïaid shakhmat ban lap ïa ka daw tynrai halor katei ka jingjia.
