Shillong Jylliew 24
Hadien ka jingpynkynriah kam ïa ki pulit ophisar kynthup ïa ki Superintendent of Police (SP) kiba peit ïa ki district bapher bapher, mynta pat ka Sorkar ka la pynkynriah kam biang sa ïa ki IAS ophisar kynthup ïa ki Deputy Commissioner bad kiwei pat ki IAS ophisar ha ki kyrdan ba kham heh.
Katkum ka jingpynbna kaba la pynmih da ka Sorkar lyngba u Secretary ka tnat Personnel & A.R (A) u Bah Cyril VD Diengdoh ha ka Lah Sngi U Blei, ka Kong Rosette Mary Kurbah kaba la shah pynkynriah kum ka Deputy Commissioner ka East Khasi Hills district lai bnai mynshwa, mynta kan shimti biang ban bat ïa kane ka kyrdan da kaba bujli ïa u DC uba mynta u SC Sadhu.
Ka Kong Kurbah ha kine ki khyndiat bnai ka la shong ha Secretariat bad shimti kum ka Secretary ka tnat Community & Rural Development, Fisheries bad kiwei ki tnat nalor kum ka Director ka tnat Community & Rural Development.
Da ka jingpynkynriah ïa ka Kong Kurbah na Secretariat sha DC ophis, u SC Sadhu pat na ka kyrdan kum u DC ka East Khasi Hills district un kynriah noh biang sha Secretariat ha ka kyrdan Secretary bad un shimti ban peit ïa ki tnat treikam kiba peit da ka Kong Kurbah kiba kynthup ïa ka tnat Community & Rural Development, Fisheries, nalor ka tnat Animal Husbandry & Veterinary, bad Water Resources Department. U Sadhu un long ruh u Director ka tnat Community & Rural Development ynda u la wan ban shimti.
U Sadhu bad ka Kong Kurbah ki la shah pynkynriah kam ha u Lber mynta u snem, ha shwa ban pynlong ïa ka ilekshon Lok Sabha, ha kaba u Sadhu kum u DC ka East Khasi Hills district u la long ruh u Returning Officer ka Shillong Parliamentary konstitwensi.
Nalor u Sadhu bad ka Kong Kurbah, kiwei pat ki IAS ophisar kiba shah pynkynriah kam ki long u A. Baranwal uba long u Deputy Commissioner, East Jaiñtia Hills district uba la shah pynkynriah noh ban shimti kum u Deputy Commissioner ka Ri-Bhoi District, Nongpoh.
U S. Awasthi, u Deputy Commissioner ka South Garo Hills District, Baghmara u la shah pynkynriah ban leit shimti kum u DC ka East Jaiñtia Hills District, Khliehriat.
U MCS ophisar, u Pilot R. Marak, uba dei u Additional Deputy Commissioner ka South Garo Hills District, Baghmara un peit un khmih shwa shipor ïa ka shlem treikam u Deputy Commissioner, South Garo Hills district, Baghmara.
