Shillong, Naitung 15
U Bah Alexander Laloo Hek uba dei u MLA ka Pynthorumkhrah bad Nongïalam ka BJP u la ong ba ki ophis Sorkar kim dei ban buh ïa ki jaka mane Blei.
Kane ka jingkynthoh jong u Bah AL Hek kala mih tang shisngi hadien ba ka Khasi Students’ Union (KSU) kala khang tala ïa ka mandir bala shna ha phyllaw ka Central Bureau of Investigation (CBI) ha Shillong bad dawa ban pynpra noh ïa ka hapoh ka shi taïew.
Haba kylli halor ka jingleh ka KSU, u Bah Hek u la ong ba kane kam dei satia halor ka jingkyrshan ne jingpyrshah ïa ka jingpynsangeh ïa ka jingtei.
Hynrei, u la pynpaw ïa ka jingsngew shimet ba ki jaka mane blei kim dei ban don ha ki jaka treikam paidbah.
“Ki jaka mane blei ki dei ban don ha ki jaka shimet, ym ha ki jaka shakri paidbah la ka dei ha ki ophis ka Sorkar Jylla lane Sorkar Pdeng,” ong u Bah Hek.
“Phi tip ba ka rukom treikam, baroh ki jaidbynriew ki trei ha kawei ka jaka, kumta ym dei satia ban don ïa ki jaka mane blei. Ki jaka mane blei ki dei ban long la ka jong, ym ha ki jaka trei paidbah,” la ong u Bah Hek.
Ha kajuh ka por u Bah AL Hek u la pynksan ba ki ophis ka Sorkar lane jaka paidbah ki dei kiba rung ba mih da ki briew kiba dei na ki jaidbynriew ne niam bapher-bapher.
