Shillong, Naitung 15
Ka National People’s Party (NPP) Farmers Front ha ka sngi Balang ka la pynlong ïa ka jingïalang ha ophis jong ka NPP ha Polo, Shillong, ban ïakren halor ki sienjam ban kyntiew ïa ka rep ka riang bad ban pynkhlaiñ ïa ka jingïoh jingïarap jong ki nongrep ha ka Jylla.
Ha kane ka jingïalang la donlang u Myntri Rangbah ka Jylla, u Conrad K. Sangma, ryngkat u Chairman ka NPP Farmers Front, Bah HM. Shangpliang, u Bah Egenstar Kurkalang, u Bah Daniel Thangkhiew, OSD jong u Myntri Rangbah, lem bad ki nongrep ba na kylleng ki District jong ka Ri Khasi bad Jaiñtia.
Ha ka jingïalang la ïakren bniah halor ki sienjam ban kyntiew ïa ka rep ka riang, ban pynkhlaiñ ïa ka jingïoh jingïarap jong ki nongrep bad ban pynbun ïa ki lad kamai jingïoh jingïarap lyngba ki skim bad ki prokram bapher-bapher jong ka Sorkar Jylla.
Ki nongrep ki la pynpaw ïa ka jingsngewnguh ïa ka Sorkar MDA ba la lamkhmat da u Conrad K. Sangma. Kiba la ong ba naduh ba ka Sorkar ka la shimti ïa ka synshar khadar, ki nongrep ki la ïoh shibun ki jingmyntoi lyngba ki skim kum ka FOCUS Plus, Piggery Mission, CM ASSURE bad shibun kiwei pat ki prokram kiba la pynmyntoi ïa ka rep ka riang ha Meghalaya.
Ha kajuh ka por, ki nongrep ki la kyrpad ïa u Myntri Rangbah ban kham pynsted ïa ki sienjam ban pynïaid ïew ïa ki mar rep jong ki sha ki ïew kiba heh. Ki la kdew ba ka jingpynïaid ïew ïa u Sohtrun ka la long ka jingïarap kaba khraw bad ki la ai jingmut ba dei ban nang pynbun shuh-shuh ïa kum kine ki lad, kynthup ïa ka jingpynlong ïa ki ïew paidbah ha ki nongbah kum ha Delhi bad kiwei pat ki Jylla, khnang ba ki mar rep jong ka Meghalaya kin ïoh ïa ka ïew kaba heh kumjuh ban pynkiew ïa ka jingïoh jingïarap bad ka jingïohnong jong ki nongrep.
