Shillong, Naitung 15
Ka Kutumba Surakshya Parishad (KSP) kala pyrshah jur ïa ka jingdawa jong ka Khasi Students’ Union (KSU) ban pynpra noh ïa ka jaka mane blei kaba don hapoh jong ka ophis CBI ha Shillong, da kaba ong ba ka dei ka jingma ïa ka jinglong jingman jong ka jingïoh ban mane laitluid.
Ha ka kyrwoh ha ka sngi Balang u President ka Parishad u Satya Ranjan Borah u la ong, ba katei kan long ka nuksa kaba bakla bad kaba ïaid pyrshah ïa ka hok katkum ka riti synshar ka ri.
U la shim ba katei ka jingdawa ka long pyrshah bad ka dei ruh kaba long pyrshah ïa ka riti synshar ka ri bad kaba pyrshah ïa ka ri bad ka bynrap ba kane ka jingleh ka lah ban wanrah ïa ka jingbym shongsuk shongsaiñ.
U Satya Ranjan Borah u la pynkynmaw ba ha u snem 2018 ha kaba ïadei bad ka krem Mawjymbuin ha Mawsynram, haba ki bor kiba dei khmih jong ka Meghalaya kila pynthikna ïa ka seng ban ai jingïada ïa ka hok ban mane laitluid.
U la kam ba kane ka jingjia kaba mynta kala pynkhihwin ïa ka jingshaniah ïa ka Sorkar Jylla ha ka jingbat skhem ha ka riti synshar ka ri bad ïa ka hok ban mane.
“Ka India ka dei ka ri kaba ïoh ban mane laitluid bad man la ki nongshong shnong ki don ïa ka hok ban mane katkum ka jingngeit ka jong ki. Ngim dei ban kyrshan ïa kum kitei ki jingleh ki ban thaw ïa ka jingïakynad ha ka imlang sahlang bad hapdeng ki jaidbynriew,” ong u Ranjan Borah.
Ka Kutumba Surakshya Parishad kala kyntu ïa u Myntri Rangbah ka Jylla u Conrad K Sangma ban tuklar lem bad ban pynthikna ba ki paidbah ha kylleng ka Jylla kin ïoh ban mane laitluid ïa ka niam khlem kano-kano ka jingshah pynthud.
Ka Kutumba Surakshya Parishad kaba don ïa ka ophis treikam na Guwahati, kala ong ba ka trei ha kiba bun tylli ki Jylla ban kyntiew ïa ka jingïatylli ha ka ri bad ban ïa im lang baroh da ka jingsuk jingkmen.
