Shillong, Naitung 15
Ka Special Intensive Revision (SIR) jong ka thup kyrteng ki nongthep ‘vote’ ha Meghalaya ka la kynjoh sha ka 89.03% ha kaba la sam ïa 20,91,781 tylli ki ‘Enumeration Form’ na ki 23,49,645 ngut ki nongthep ‘vote’ haduh ka 15 tarik Naitung.
Kane ka long katkum ka ‘Status Report’ ba la pyllait da u Chief Electoral Officer (CEO).
Kane ka sienjam, kaba la pynlong hapoh ka jingbthah jong ka Election Commission of India (ECI), ka thmu ban pynkhreh ïa ka thup kyrteng nongthep ‘vote’ kaba biang bad kaba khlem jingbakla hashuwa jong ki ilekshon ban wan.
Katkum ka kaiphod, ki ‘Enumeration Form’ kiba la dep pynrung lyngba ki lad ‘digital’ haduh mynta ki long 6,72,094 tylli – kaba kot sha ka 28.60% na baroh ka jingdon ki nongthep ‘vote’ ha ka Jylla.
Ka ophis u CEO ka la pynpaw ba ka jingsam ïa ki phom na kawei ka ïing sha kawei pat da ki Booth Level Officer (BLO) ka dang ïaid shakhmat ha baroh 12 tylli ki distrik, bad la pyntikna ruh ïa ka jingpynkylla ‘digital’ kaba ïai bteng ban pynïabiang bad ka por ba la buh da ka ECI.
Ki jingtip kiba wan na ki distrik ki pyni ïa ka jingpher kaba khraw haba phai sha ka jingpynïaid kam.
Ka South West Garo Hills ka lamkhmat ha kaba ïadei bad ka jingsam da 99.96%, bud sa ka West Jaiñtia Hills – 99.33% bad ka North Garo Hills – 96.62%. Ka South West Khasi Hills bad ka Ri-Bhoi ruh ki paw napdeng ki 5 tylli ki distrik kiba hakhmat haba ïadei bad ka jingsam ïa ki phom, ha kaba ka South West Khasi Hills ka la kynjoh sha ka 96.39% katba ka Ri-Bhoi pat – 94.79%.
Ha kaba ïadei bad ki lad pynïasoh ‘digital’, ka East Jaiñtia Hills ka wan hakhmat duh ha ka thup jong ki phom ba la dep pynrung, kata 48.01%, bud sa ka South West Khasi Hills – 46.02%, Eastern West Khasi Hills – 41.36%, South West Garo Hills – 40.33%, bad West Garo Hills – 38.57%. Ka East Khasi Hills, ka distrik kaba don bun eh ki nongthep ‘vote’ kaba long 6,32,146 ngut, ka la kot haduh 78.60 % ka jingsam bad 14.08 % lyngba ki lad ‘digital’ haduh kine ki sngi.
Ki mat ba kongsan ba la kdew da ka ophis u CEO ki kynthup ïa ka jingjop ban ‘download’ ïa baroh 3,551 tylli ki bynta jong ka ‘Enumeration Form’ da ki BLO, kaba pyni ïa ka jingpyndep kaba 100%, bad ba ki kam SIR ki don ha ka lynti ban pyndep katkum ka por ba la buh da ka Election Commission.
Na ka liang u CEO u la kyrpad ïa ki nongthep ‘vote’ ki bym pat ïoh ne pynpoi ïa ki ‘Enumeration Form’ ban ïatreilang bad ki BLO ha ka por ba ki wan mih sha ki ïing ki sem bad ban pyndep kloi katba lah ïa kane ka kam.
La bthah ruh ïa ki nongthep ‘vote’ ba kin kynjoh sha la ki jong ki jong ki BLO na ka bynta kino-kino ki jingïarap.
