Shillong, Naitung 15
Ka Khasi Students’ Union (KSU) North Khasi Hills District Unit, ha ka step jong ka sngi Balang ka la pynap shrip bad ïoh bat ïa kawei ka kali shimet (Private) ba pyndait da u nombor plate thok bad la kynnoh ba ka dei ka kali ba ju shalan drok ha ka thaiñ Umsning.
La ong ba na ka jingïoh jingtip ba ka don ka kali kaba la kylliang number plate, ki dkhot ka KSU NKHD ki la pynlong ïa ka jingap ha Nongpoh ban bat ïa katei ka kali rong lieh, hynrei ka la lait salit noh bad na kane ki dkhot ka seng ha ka jingïalam u Samla Jester Nongbet, u Organising Secretary ka KSU NKHD ki la pynlong ïa ka jingap shrip bad ïoh kem ruh ïa katei ka kali ha Umsning.
“Ka seng ka la ïoh ïa ka jingtip ba tikna kaba ïadei bad ka jingdon ka kali shimet kaba mut shalan ïa u drok (drugs). Kine ki nongshalan drok ki la leh thok da kaba buh ïa u number plate nongwei ne number plate ba bakla halor ka kali jong ki” ong ka kyrwoh ka KSU.
Ka Seng ka la lap ba don ka jingïasylla hapdeng ki briew ba nabar Jylla ryngkat ki katto-katne ki samla Khasi kiba long ki nongkit bad nongshalan ïa u drok hapoh ka Jylla bad ka seng ka la kynnoh ba kine ki briew ki pynlong ïa ka thaiñ Umsning bad Ri-Bhoi baroh kawei kum ka lynti ban pynpoi ïa u drok sha kiwei pat ki jaka.
Ka KSU ka la tohkit ïa kitei ki briew bad kham hadien ka la aiti noh ïa ki sha ki pulit ka thanad Umsning ban pynlong ïa ki jingtohkit ba katkum ka aiñ bad ka la kyntu jur ïa ki bor ka aiñ ban nym map ïa kiba kum kine ki briew kiba pynsniew ïa ka imlang-sahlang.
