Shillong, Naitung 15
Ka North Eastern Council (NEC) ka la pyllait palat T.13.58 klur sha ka Jylla Meghalaya hapoh ka skhim ‘SoNEC’ jong u bnai Jymmang-Jylliew 2026 na ka bynta ki projek ha ka koit ka khiah, ka pule-puthi, ka bording, ka kolshor bad ki lad pynïasoh.
Ki jingmang pisa ba kongsan ki kynthup ïa ka jingbuh ïa ka ‘Tesla MRI’ kaba 1.5 ha Tura Civil Hospital ban pynbha ïa ka jingpeit bniah ïa ki jingpang ha Ri-lum Garo, bad ka jingkyrshan haba ïadei bad ki jingtei na ka bynta ka Shillong Polytechnic bad ka Multi-Disciplinary Training-cum-Resource Centre da ka NERCORMS.
Ha ka liang ka kolshor bad ki jingtei ha ka imlang-sahlang, ka NEC ka la bei tyngka ïa ka Seng Khasi Cultural Complex bad ka Seiñraij Jowai Community Hall.
Ka la kyrshan ruh ïa ki kam pynbha ha Ïewduh ban ai jingmyntoi ïa ki nongkhaïi bad ki nongrep.
Na ka bynta ka bording ba lah ban pynthymmai biang, ka NEC ka la mynjur ban leh ïa ka ‘survey’ na ka bynta ka Mawblei, Myntdu Leshka Stage-II bad ki Selim Hydro Project.
Ka surok jong ka Kad Liengsuiñ Shillong-Umroi, kaba la bei tyngka ruh da ka NEC, la pyndep ha u bnai Jylliew, 2026 ban kyntiew ïa ka jingïoh rung ha ki Kad Liengsuiñ, kam jngohkai pyrthei bad ka khaïi-pateng.
Nalor kane, ka NEC ka la pyllait T.18.93 klur sha ki ‘Regional Agency’, ki skulbah, ki seng treimon sngewbha bad ki ‘Society’ ha kylleng ka Thaiñ Shatei Lam Mihngi.
Shi bynta jong kane, ka la kyrshan ïa ki jingïalang ha Meghalaya ba kynthup ïa ka Industry Academia Research Conclave-2025 ha NIT-Meghalaya bad ka Miss & Mister Beauty Pageant-2026 ha NEIGRIHMS.
Ka Council ka la ong ba kane ka jingbei pisa ka thmu ban pynkhlaiñ ïa ki kam shakri paidbah bad ban pynsted ïa ka roi ka par kaba kynthup lang ha baroh kawei ka Meghalaya.
