Shillong, Jylliew 25
Ka Hynñiewtrep Integrated Territorial Organisation (HITO) ha ka Sngi Ba-ar ka la leit ban ujor da ka ejahar pyrshah ïa ki briew kiba la khrong pisa beaiñ na ki kali ha kyrteng jong ka seng na surokbah NH-6 ha Mawlai Petrol Pump.
Katkum kane ka ejahar ba la ai da ka HITO Shillong City, la ong ba ka seng ka la ïoh pdiang bun ki jingujor na ki ‘riewshimet ba ki don ki briew kiba leh mynleh kum ki dkhot ka HITO bad khrong pisa beaiñ na ki kali kiba ïaid ba ïeng ha surok bah.
La ong ruh ba kane ka jingkhrong pisa beaiñ da kine ki briew ka dei beit ha ka por 4 baje mynstep; ka por kaba dang kynjah bad kumba la kdew ha ka ejahar la ong ruh ba une u briew uba khrong pisa beaiñ, u la pyndonkam da ka kali rong lieh i20 kaba don ïa u registration number ML10-D-7737.
Ha kaba ïadei bad kane, ka HITO ka la maham tyngeh ïa kino kino ki briew ban khrong pisa ne leh kino kino ki kam bymman ha ka kyrteng jong ka seng. Ha kajuh ka por ka la kyntu ruh ïa ki pulit ban shimkhia halor kane bad ban pynshitom ïa ki briew kiba donkti ha kane ka kam.
