Tura, Jylliew 25
U nongïalam seng samla ka TMC, u Richard Marak ha ka Sngi Ba-ar u la pynsngew biang na bynta ka jingdawa tohkit ba laitluid da ka kynhun tohkit ha Sorkar Pdeng halor ka jingkynnoh shah liang da ka Sorkar haba ïadei bad ka jingai kam kontrak heh sha ka Badri Rai Company (BRC).
U Marak u la dawa ïa katei ka jingtohkit naba u sngew ba ka donkam ban lap ïa ka jingshisha haba ïadei bad ki jingjia bad ki rukom shah liang bad bamsap, ban pyntikna ïa ka jingkitkhlieh na bynta kito kiba donkti ha ki jingpynïaid bakla bad jingleh thok pisa, ban khmih bniah ïa baroh ki kam kontrak heh ba la aiti ha ki snem ba la dep nalor kiwei.
Katei ka jingdawa na u Marak ka la wan hadien ki kyrwoh na ka ‘agency’ ba pyntreikam ban ïada ïa ka jingmang jong ka Tura IT Park Project sha ka BRC.
“Ka banyngkong, katba ka ‘agency’ ba pyntreikam – ka kam ba la bud ryntih ïa ki kyndon haba ïadei bad ka jingkhlieh dor (bidding process), ka long kaba donkam ban ban-jur ba ka khuid ka suba ka kynthup ym tang ka jingbud ryntih ïa ki kyndon. Ki paidbah ki don hok ban ïoh ïa ka jingbatai bniah halor ki jinglong-jingman ha ka jingkhot ‘tender’. Tang da kaba shu ong ba ki kynhun ka Sorkar Pdeng ki don bynta lang, kam pynhun pura haba phai sha ka bynta ba ïadei bad ka jingshah liang,” u la ong.
“Ka jingjied ïa ka Badri Rai and Company, wat hapdeng ka jingdon bynta jong ki ha ki jingjia ba ha shuwa kum ka jingkhyllem ka tnum pyllun ka ïingdorbar thawaiñ ka Jylla bad ka kynroh jong ka P.A. Sangma Stadium, kumjuh ki projek surok kum ka Bajengdoba-Mendi, Rongram-NH, bad surok Selsella, ka wanrah ka jingsngewkhia. Ki kam barim jong ka kompeni ki la dei ban long kiba hakhmat eh ban buh jingmut haba phai sha ka jingshim rai. Khlem da buh jingmut ïa kine kiei-kiei kiba ha shuwa, ka pyni ïa ka jingbym biang ka jingpynleit jingmut ne ka jingbym ïohi ban khmih bniah halor ka jinglah bad jingshaniah ïa ka kompeni,” u la bynrap.
Shuh shuh utei u nongïalam ka TMC u la pynkynmaw ruh ïa ki jingkynnoh halor ka kam pisa ba ïadei bad ka ‘Convoy’ u Myntri Rangbah ha kaba la ïoh bat ïa ka kali ha ryngkat T.1 klur, da kaba bynrap ba ym lah ban shu ieh noh kumto halor katei ka jingjia.
