Shillong, Jylliew 25
Ka Hill State People’s Democratic Party (HSPDP) ha ka Sngi Ba-ar ka la ai jingmut sha ka ‘Expert Committee’ ba khmih ïa ka bhah thung kam ka Jylla ban bhah beit 80% na bynta ki Khasi-Jaiñtia bad Garo.
“Ka seng kumba la kdew ha ki mat jingkular ban khmih bniah ïa ka bhah thung kam, kumta ka jingai jingmut jong ngi ka long ban kyllum lang noh 40-40…kata 80% na bynta ki Khasi-Jaiñtia bad Garo katkum ka ‘merit’ haba ïadei bad kano-kano ka jingwad kam Sorkar,” la ong u General Secretary ka HSPDP, Bah Panbor Ryntathiang haba kren sha ki lad pathai khubor.
U la ong ruh ba kane kan wanrah ïa kata kaba ki ong ka ‘healthy competition’ hapdeng ki samla khlem kam kiba la nang la stad.
Haba phai sha ka ‘Office Memorandum’ (OM) jong ka 18/12/1972 halor ki kam ha ki distrik, ka seng ka ai jingmut ba dei ban bhah 90% na bynta ki Khasi-Jaiñtia ha ki distrik ka Ri-lum Khasi-Jaiñtia katba 90% ïa ki Garo ha ki distrik Ri-lum Garo.
“Haba ïadei bad ka para 2 jong ka ‘Resolution’, kaba kdew ba ‘lada don ka jingduna ha ka jingdon jong ki ST bad SC, yn rah sha u snem thung kam ban wan…’, ka seng jong ngi ka ai jingmut ba dei ban weng noh ïa kane ka jingrah sha kawei pat ka snem…kaba mut ba lada ha kata ka snem, ka Sorkar ka khot ban thep kam, dei ban pyndep noh ha kato ka snem khlem da rah shuh sha kawei pat ka snem,” la ong utei u nongïalam hadien ba la aiti ïa ki jingai jingmut sha u Secretary ka komiti.
Shuh shuh u la bynrap ba ha ka State Reservation Policy (12/01/1972), la shem ba kam don kano-kano ka jingkdew kaba biang haba ïadei bad ka jingïoh ‘mark’ ha ka bhah na bynta ka jingpule (Academic Career) na bynta ki Khasi-Jaiñtia bad Garo.
“Ka seng ka kyrpad ïa ka komiti ban khmih bniah ïa kane ka bynta,” la ong u Bah Ryntathiang.
