Shillong, Jylliew 25
Ki nongïalam bad dkhot ka Hynñiewtrep Youths’ Council (HYC) Sohïong Zone ha ka 25 tarik u Jylliew 2024, ki la shah khot hajir ha ki pulit jong ka thanat Sadar hadien ba ki la shah ujor da ka ejahar ha u Bah Phriden Thabah halor ka jingdonkti ban leit kyndang ïa ki nongtrei bar jylla kiba trei ha ka ïing jong u ha Sohïong ha kine ki khyndiat taïew ba la leit.
Ha ka jingïakren bad ki lad pathai khubor, na ka liang u President ka HYC Sohïong Zone, u Bah Purningstar Shabong u la ong, ba ka jingkhot jong ki pulit sha Sadar ïa ki dkhot ka seng ka dei halor ka jingshah ujor ejahar ha u Bah Phriden Thabah uba la kynnoh ba ka seng ka la donkti ban thombor bad pynmynsaw ïa ki bar jylla kiba trei la ktah ha ïing jong u ha ka por ba ka seng ka la leit ban jurip ïa ki bar jylla ban khmih halor ka jingdon ïa ki kot ki sla kiba biang.
U Bah Shabong u la ong ba ha ka jingleit jurip jong ka seng ha ka 7 tarik bad 10 tarik u Jylliew, ka dei hadien ba ka seng ka la ïoh jingtip ba ka shnong kam shym la ai jingbit ïa kitei ki bar jylla ba kin trei ha katei ka jaka.
U la ong ba ka seng kam shym la ktah kti ne jrong kti ne pynmynsaw ïa kitei ki bar jylla hynrei ka la shu leit ban kyndang namar kim pynbiang ïa ki kot ki sla ki ban trei ban ktah ha ka ïing kaba la long trai da u Bah Phriden Thabah.
“Ha ka jingleit ka jong ngi, ngi lap shisha ba kitei ki bar jylla kiba trei hangto kim biang shisha ïa ki kot ki sla bad halor kata ka nongrim, na ka liang jong ngi, ngi bthah ïa ki trai ïing ba kin phah noh ïa ki bar jylla sha shnong”, la ong u Bah Shabong.
U Bah Shabong u la ong ba ka jingujor ejahar da u Bah Phriden Thabah uba dei trai ïa katei ka ïing bad uba la pyntrei da ki bar jylla pyrshah ïa ka seng ka dei ban kynnoh beit ba ki la ktah kti bad pynmynsaw ïa ki nongtrei bar jylla. Hynrei ha ka jingshisha ha katei ka sngi ba ka seng ka la leit kam shym la jrong kti satia ïa kitei ki bar jylla hynrei ka lah phah ïa ki ba kin leit phai noh namar kim don ïa ki kot ki sla kiba biang bad kitei ki bar jylla kim pat ïoh wat ïa ka jingthoh ne ka jingbit napoh ka shnong ban wan trei hapoh ka shnong.
Shuh shuh u la ong ba ka seng kan sa nang ïai buddien bad khmih ïa ka jingwan rung kyrthep ki bar jylla shapoh ka thaiñ Sohïong khamtam ïa kito ki bym biang ïa ki kot ki sla namar ka Jaitbynriew ka don hapdeng ka jingma lada ki bar jylla ki wan ban rung sha ka dong ka thaiñ khlem da don ïa ki kot ki sla kiba biang.
