Shillong, Jylliew 25
Ka National People’s Party (NPP) kaba lamkhmat ïa ka Sorkar MDA ka lah ban mad jingeh ha kaba ïadei bad ka jingjied kyrtong na ka bynta ka ilekshon MLA shiteng samoi ha Gambegre konstitwensi namar ki don ym duna ïa ka 10 ngut kiba pan tiket bad shen yn sa shim ïa ka rai.
Katkum ka khubor la ong ba ka don ruh ka jingkwah na ki nongïalam ban phah ïa ka kurim u Myntri Rangbah u Conrad K Sangma, kata, ka Dr Metab Chandee A Sangma ban long ka kyrtong na Gambegre konstitwensi ha ka ilekshon shiteng samoi ka ban sa wan. Ki don ruh kiwei pat kiba kwah tiket kynthup ïa ki MDC ka NPP kiba dei na kato ka thaiñ.
La ong ba wat ka Congress ruh ka don bun ngut kiba pan tiket ban ïakhun na Gambegre konstitwensi ha kaba ka kyrteng jong ka Symbud Myntri Rangbah barim ka Deborah C Marak ruh ka sawa. Hynrei ka rai kan shong eh ha u MP ka Tura u Saleng A Sangma namar u kham sngewthuh kham bha ïa ka saiñ hima sima ha Gambegre kaba u la mihkhmat kum u MLA la palat 15 snem.
Ka TMC ruh ka dang pyrkhat ban pynïakhun biang ïa ka kurim u MLA barim Zenith Sangma ka Sadhiarani kaba la ju ïakhun na Gambegre konstitwensi ha ki ilekshon ba la dep.
Ka Gambegre konstitwensi ka la sah thylli khlem MLA hadien ba u Saleng A Sangma u la iehnoh kam kum u MLA kane ka konstitwensi ha ka 10 tarik mynta u Jylliew namarba u la shahjied kum u MP ka Tura parliamentary konstitwensi.
U Saleng u la pynliem ïa ka Agatha K Sangma ha ka ilekshon Lok Sabha na Tura da kaba tam haduh 1.55 lak vote.
