Nongstoiñ, Risaw 09
Ka jingmynthi bad ka jingbym suidñiew jong ka Sorkar Jylla ban pyntreikam noh ïa ki aiñ, ïa kaba ka komiti kala pruid dak ïa ki kyndon bad ki aiñ ban ailad ïa ki nongtih maw tih shyiap, ki nongkhaïi maw, khaïi shyiap ba kin pyndonkam paidbah ha ki jaka ki jong ki, kala pynlong ïa ki nongtih maw tih shyiap, ki nongkhaïi maw, khaïi shyiap ka West Khasi Hills ba kin pynkhreh ban kiew sha nongbah Shillong ban pynlong da ka jingshong shah thngan kum ka jingdawa ïa ka Sorkar ba kan leh eiei noh.
Ïa kane ka rai la shim ha ka jingïalang jong ki nongtih maw, tih shyiap, ki nongkhaïi maw, khaïi shyiap hapoh ka lama jong ka seng na West Khasi Hills ha ka jingïalang mynta ka janmiet kaba la long ha Nongstoiñ, ïa kaba la pynthikna ruh da u Bah Mawkordor Kharsyiemlieh, Secretary ka seng haba kren bad u nongthoh khubor.
Haba batai bniah halor kane ka bynta, u adviser ka seng Bah Moslandar Marngar u la ong ba kane ka jingïalang ha kane ka sngi kam dei kaba ki khot na ka liang ki nongïalam bad kane ka jingïakhih ka dei kaba la sdang naduh ki ar snem mynshuwa kaba la don ka jingeh halor ka kam tih maw, tih shyiap kaba la don shipor ka jingshah kem ki kali lane ki nongtrei maw nongtrei shyiap ha kane ka District.
U la ong, kane ka mat kala pur sha kiwei ki District bad kala don ka jingkhot jingïalang jong baroh ki District bad kala don ruh ka jingïakhih bad hadien kane ka Sorkar kala khot ïa ka jingïakren bad hadien ka jingkhot ïakren la thaw ïa ka komiti ba la khlieh da u Symbud Myntri Rangbah Bah Prestone Tynsong bad kumba saw ngut ki MLA ki la don ha kane ka komiti.
U Bah Moslandar u la ong ruh ba ha kane ka komiti la dep ban ïa shong haduh laisien bad la thaw ïa kita ki aiñ ban ailad ïa ki nongtih maw tih shyiap, kiba khaïi maw khaïi shyiap na ka bynta ka jingpyndonkam ha ki jaka ki jong ki, ba kin ïoh pyndonkam paidbah ban ïoh trei, ïoh tih u rit u ria.
