Shillong, Risaw 09
Ka jingïakynad ka la mih hapdeng ki pulit bad ki nongdie madan ha Jail Road ha ka sngi Palei bad sngi Thohdieng hadien ba ki briew jong ka Shillong Municipal Board (SMB) ki la pyrshang ban kurup ïa ki mar ki mata jong ki nongdie madan kiba shong ha shilynter katei ka lynti ïaid kjat.
Ki pulit hashuwa kane, ki la khang ïa ka lynti ïaid kjat na Jail Road sha Polo, kaba la pynlong ïa ki paidbah kiba ju pyndonkam ïa katei ka lynti ban hap ïaid pat na kawei ka lynti lyngba ka Khyndailad ban leit sha Polo.
Ka jinglong jingman ka la wanrah ïa ka jingïakynad kaba jur bha hadien ba ki nongdie jingdie ha katei ka surok, ki la pyrshah ïa ka jingpyrshang jong ki pulit bad ki briew jong ka SMB ban khanglad ïa ki ban die ïa ki mar jong ki ha shilynter ka lynti ïaid kjat kumba ki ju die man ka sngi.
Ki nongdie ki la pyrshah jur ruh ïa ki briew jong ka SMB kiba la pyrshang ban kurup ïa ki mar jong ki bad ban thep ïa ki ha ka kali, kaba la ïathuh ba ka kali ka la don lypa na ka bynta katei ka jingthmu ban kit ïa ki mar ki mata jong ki nongdie madan.
Haba kren sha ki lad pathai khubor, ka President jong ka Hynñiewtrep Jail Road Street Vendors Association, Shillong, ka Kong Clarissa Jordana Sohtun ka la ong ba mynta ki don haduh 43 ngut ki nongdie madan kiba dei ki Khasi kiba shong ha shilynter ka lynti ïaid kjat ha Jail Road.
Na kine, ka la ong ba tang 24 ngut ki dei kiba la ïoh ïa ka Certificate of Vending (CoV), katba 19 ngut pat ki la shah kyntait, ha kaba la kdew ïa ka daw ba kam don ka jingpynshisha ba ki dei ki nongdie madan.
Ki nongdie madan ki la bteng ban pyrshah ïa ka jingpyrshang ban weng ne rah ïa ki mar jong ki wat haba ki pulit bad ki ophisar ka SMB ki dang don ha katei ka shilynter ka lynti ïaid kjat.
